বৰপেটা ২৩ জানুৱাৰী: বৰপেটা চিকিৎসা মহাবিদ্যালয়ৰ হাস্পতালত সোমবাৰে চিকিৎসাধীন অৱস্থাত মৃত্যু ঘটে এগৰাকী ১৩ বছৰীয়া কিশোৰীৰ ৷ মৃত্যুমুখত পৰা কিশোৰীৰ ঘৰ গোৱালপাৰা জিলাৰ ৰংছাই আৰক্ষী চকীৰ অন্তৰ্গত ভুচখুলি গাঁৱত ৷ ৭ মাহৰ পূৰ্বে ধৰ্ষণৰ বলি হোৱা কিশোৰীগৰাকীয়ে দেওবাৰে নিশা গোৱালপাৰা অসামৰিক হাস্পতালত জন্ম দিছিল এটি পুত্ৰ সন্তান (Minor Rape Survivor Gives Birth ) ৷ কিন্তু সন্তানটোৰ জন্মৰ কিছু সময়ৰ পিচতে মৃত্যু হৈছিল সন্তানটিৰ ৷
ইপিনে কিশোৰী মাতৃগৰাকীৰো স্বাস্থ্যৰ ক্ৰমে অৱনতি ঘটাত তেওঁক ততাতৈয়াকৈ উন্নত চিকিৎসাৰ বাবে বৰপেটা মেডিকেল কলেজ হাস্পতাললৈ (Fakhruddin Ali Ahmed Medical College) প্ৰেৰণ কৰা হয় ৷ কিন্তু চিকিৎসকৰ অশেষ প্ৰচেষ্টাৰ পাছত চিকিৎসাধীন অৱস্থাতে মৃত্যুমুখত পৰে কিশোৰীগৰাকীৰ ৷ পৰিয়ালৰ লোকে জনোৱা মতে সাত মাহ পূৰ্বে ধৰ্ষণৰ বলি হৈছিল ১৩ বছৰীয়া কিশোৰীগৰাকী ৷ বান্ধৱীৰ ঘৰলৈ ফুৰিবলৈ যোৱাৰ সময়তে ওচৰৰে যোগ চাংমাই নামৰ ৪০ বছৰীয়া এজন লোকে ভয়-ভাবুকিৰে ধৰ্ষণ কৰিছিল কিশোৰীগৰাকীক ৷
অভিযুক্ত যোগ চাংমায়ে কিশোৰীগৰাকীক ধৰ্ষণৰ পাছত তেওঁক ঘটনাৰ বিষয়ে পৰিয়ালৰ লোকক অৱগত কৰিলে হত্যা কৰাৰ ভাবুকি দিয়ে ৷ যাৰ বাবে ভয়তে কিশোৰীগৰাকীয়ে পৰিয়ালৰ লোকক জনোৱা নাছিল কোনো কথা ৷ ধৰ্ষণৰ বলি হৈ অৱশেষত অকাল মাতৃত্বক আঁকোৱালি ল’বলগীয়া হোৱা কিশোৰীগৰাকীয়ে আজি এটি সন্তান প্ৰসৱ কৰাৰ পাচত চিকিৎসাধীন অৱস্থাতে কৰুণ মৃত্যু আঁকোৱালি ল’বলগীয়া হয় ৷
ইফালে অভিযুক্ত যোগ চাংমাইৰ বিৰুদ্ধে গোৱালপাৰাৰ ৰংছাই আৰক্ষী থানাত পৰিয়ালৰ লোকে এজাহাৰ দাখিল কৰিছিল যদিও যোগ চাংমাইক আৰক্ষীয়ে এতিয়ালৈকে গ্ৰেপ্তাৰ কৰিবলৈ সক্ষম হোৱা নাই ৷ ইপিনে ধৰ্ষণৰ বলি হৈ সন্তান প্ৰসৱ কৰিবলৈ বাধ্য হোৱা কিশোৰীৰ কৰুণ মৃত্যুকলৈ এতিয়া গোৱালপাৰাৰ ৰংছাই অঞ্চলত সৃষ্টি হৈছে তীব্ৰ প্ৰতিক্ৰিয়াৰ ৷ স্থানীয় লোকে আৰক্ষী ভূমিকাকো লৈ সন্দেহ ব্যক্ত কৰিছে ৷
উল্লেখ্য যে, মুখ্যমন্ত্ৰী হিমন্ত বিশ্ব শৰ্মাই সোমবাৰে জনতা ভৱনত এক সংবাদমেল সম্বোধন কৰি অসমত বাল্যবিবাহ কৰাসকলৰ বিৰুদ্ধে এক প্ৰকাৰ যুদ্ধ ঘোষণা কৰে ৷ অসমত অবৈধভাৱে কম বয়সৰ ছোৱালী বিবাহ কৰা অৰ্থাৎ বাল্য বিবাহ কৰাসকলৰ বিৰুদ্ধে কঠোৰ ব্যৱস্থা লোৱাৰ কথা ব্যক্ত কৰে মুখ্যমন্ত্ৰীগৰাকীয়ে (Operation against child marriage in Assam) ।
অসমত অবৈধভাৱে কম বয়সৰ ছোৱালী বিবাহ কৰাসকলক আৰু এই বিবাহত সহায় কৰাসকলক কঠোৰ হাতেৰে দমন কৰাৰ বাবে এই পদক্ষেপ গ্ৰহণ কৰাৰ কথা জানিবলৈ দিয়ে মুখ্যমন্ত্ৰীয়ে । কোনো লোক ধৰা পৰিলে কাৰাগাৰলৈ প্ৰেৰণ কৰা হ’ব বুলিও সকীয়নি প্ৰদান কৰে মুখ্যমন্ত্ৰীগৰাকীয়ে (Assam CM strict against child marriage) ৷ এনে পৰিস্থিতিত ধৰ্ষণ তথা নাবালিকা ধৰ্ষণকাৰীৰ বিৰুদ্ধে অসম চৰকাৰ তথা আৰক্ষীয়ে কেনে পদক্ষেপ গ্ৰহণ কৰে, সেয়া সময়তহে জানিব পৰা হ’ব ৷
লগতে পঢ়ক: Woman Gang Raped : জন্মদিনৰ পাৰ্টীত মহিলাক দলবদ্ধ ধৰ্ষণ, গ্ৰেপ্তাৰ ৩
