বৰপেটা ৫ ছেপ্টেম্বৰ : ৰাজ্যৰ ভিন্ন প্ৰান্তৰ লগতে বৰপেটাৰ চেঙাতো ব্ৰহ্মপুত্ৰৰ খহনীয়াই তীব্ৰ ৰূপ ধাৰণ কৰিছে । যাৰ ফলত কেইবাটাও পৰিয়ালৰ বাসগৃহ নিৰাপদ স্থানলৈ স্থানান্তৰ কৰিবলগা হৈছে ।
আনহাতে, স্থানীয় বিধায়ক আশ্ৰাফুল হুছেইনৰ সমষ্টিবাসীৰ খবৰ ল'বলৈ আহৰি নাই বুলি অভিযোগ উঠিছে । ইফালে নিৰ্বাচনৰ সময়ত খহনীয়া ৰোধ কৰিমেই বুলি দম্ভালি মাৰি ৰাইজক প্ৰতিশ্ৰুতি প্ৰদান কৰা সমষ্টিটোৰ বিধায়কক বিচাৰি ৰাইজে হাহাকাৰ কৰিবলগা হৈছে ।
উল্লেখ্য যে চেঙা বিধানসভা সমষ্টিৰ ৰৌমাৰী গাঁৱত দীৰ্ঘদিন ধৰি অব্যাহত আছে ব্ৰহ্মপুত্ৰৰ তীব্ৰ খহনীয়া । ফলত আতংকিত হৈ পৰিছে নৈপৰীয়া ৰাইজ । অনিদ্ৰাত পাৰ কৰিবলগীয়া হৈছে প্ৰতিটো নিশা । ব্ৰহ্মপুত্ৰৰ এই কালৰূপত বিগত দিনকেইটাত কেইবাটাও পৰিয়ালৰ বাসগৃহ স্থানান্তৰ কৰিবলগীয়া হৈছে । আনহাতে, খহনীয়াত জাহ গৈছে বহুতৰে মাটি-ভেটি ।
লগতে হাজাৰ হাজাৰ কৃষিভূমিও ব্ৰহ্মপুত্ৰৰ বুকুত বিলীন হৈছে । যাৰ বাবে উপায়হীন হৈ পৰিছে ৰৌমাৰী পথাৰ গাঁৱৰ নৈপৰীয়া ৰাইজ । তাৰ মাজতে চেঙা সমষ্টিৰ স্থানীয় বিধায়ক আশ্ৰাফুল হুছেইনৰ ওপৰত ক্ষোভিত হৈ পৰিছে নৈপৰীয়া ৰাইজ ।
জানিব পৰা মতে, খহনীয়া সমস্যা সমাধানৰ প্ৰতিশ্ৰুতিৰে ৰাইজৰ ভোটেৰে জনপ্ৰতিনিধি হোৱা আশ্ৰাফুল হুছেইনে বৰ্তমানলৈকে খবৰ লোৱা নাই খহনীয়াত ক্ষতিগ্ৰস্ত লোকসকলৰ । ফলত কথা আৰু কামৰ মাজত মিল নাই বুলিও ক্ষোভ প্ৰকাশ কৰিছে বিধায়ক আশ্ৰাফুল হুছেইনৰ বিৰুদ্ধে ।
আনকি চৰকাৰ তথা জলসম্পদ বিভাগৰ ফালৰ পৰাও আজিলৈকে খহনীয়া প্ৰতিৰোধৰ বাবে কোনো ব্যৱস্থা গ্ৰহণ কৰা হোৱা নাই । সেয়ে ৰৌমাৰী পথাৰ গাঁৱত চলি থকা খহনীয়া পৰিদৰ্শন কৰি সেয়া প্ৰতিৰোধৰ সুব্যৱস্থা গ্ৰহণ কৰিবলৈ চৰকাৰ তথা বিভাগীয় কৰ্তৃপক্ষক কাতৰ অনুৰোধ জনাইছে নৈপৰীয়া ৰাইজে ।
আনহাতে, ইয়াৰ সমান্তৰালভাৱে চেঙা সমষ্টিৰ ৰৌমাৰী, বৰভিঠা, বহৰি আদিতো চলিছে ব্ৰহ্মপুত্ৰৰ ব্যাপক খহনীয়াৰ তাণ্ডৱ । এনেদৰে ব্ৰহ্মপুত্ৰৰ খহনীয়া অব্যাহত থাকিলে অচিৰেই অসমৰ মানচিত্ৰৰ পৰা ৰৌমাৰী গাঁৱকে ধৰি কেইবাখনো গাঁও নিশ্চিহ্ন হোৱাৰ পথত ।
লগতে পঢ়ক :Jania Constituency: বিভিন্ন সমস্যা সন্দৰ্ভত জনীয়াৰ বিধায়কৰ হাফিজ ৰফিকুল ইছলামৰ সংবাদমেল
