জনীয়া, 30 আগষ্ট : বৰপেটা জিলাৰ মন্দিয়া শিক্ষা খণ্ডৰ অন্তৰ্গত ৩৬৪ নং প্ৰাথমিক বিদ্যালয়ৰ কেইবাজোপাও গছ কাটি বিদ্যালয় পৰিচালনা সমিতি আৰু প্ৰধান শিক্ষকে মিলি বিক্ৰী কৰাৰ ফলত ৰাইজৰ মাজত তীব্ৰ প্ৰতিক্ৰিয়াৰ সৃষ্টি হৈছে । ৰাইজে অভিযোগ উত্থাপন কৰা মতে তীব্ৰ ৰ'দত কণ কণ ছাত্ৰ-ছাত্ৰীয়ে গছৰ তলত থাকি নেওতা পঢ়াৰ লগতে গছৰ তলত অধ্যয়ন কৰে । তেনে ক্ষেত্ৰত বিদ্যালয় পৰিচালনা সমিতি আৰু প্ৰধান শিক্ষকে ৰাইজক এন্ধাৰত ৰাখি মাত্ৰ ৯ হেজাৰ টকাত গছ কেইজোপা বিক্ৰী কৰাৰ অভিযোগ উঠিছে ।
ৰাইজে এই গছ কটা সন্দৰ্ভত মন্দিয়া খণ্ড উন্নয়ন বিষয়া, কলগাছিয়া ৰাজহ চক্ৰৰ চক্ৰ বিষয়াকে ধৰি বিভিন্ন ঠাইত অভিযোগ দাখিল কৰিছে বুলি জানিব পৰা গৈছে । বিদ্যালয়ৰ পৰিচালনা সমিতি আৰু প্ৰধান শিক্ষকে বন বিভাগ, শিক্ষা বিভাগ আৰু ৰাইজক এন্ধাৰত থৈ এই গছ কটাটো সম্পূৰ্ণ ভুল হোৱা বুলি মন্দিয়া খণ্ড শিক্ষা বিষয়াই শিক্ষা বিভাগলৈ প্ৰতিবেদন প্ৰস্তুত কৰিছে ৷
উল্লেখ্য যে, গছ কটাৰ পূৰ্বে বিদ্যালয় পৰিচালনা সমিতিয়ে গছ কাটিবলৈ কোনো অনুমতি লোৱা নাই বিভাগৰ পৰা । তেনে ক্ষেত্ৰত দেওবাৰে বিদ্যালয়ত মন্দিয়া খণ্ড শিক্ষা বিষয়া মতিউৰ ৰহমান উপস্থিত হৈ দেৱানীৰ ভূমিকা পালন কৰাত ৰাইজৰ মাজত শিক্ষা বিষয়া মতিউৰ ৰহমান কিছু সমালোচনাৰ পাত্ৰ হোৱা দেখা গৈছে ৷
লগতে পঢ়ক : বিজেপিত যোগদান কৰিব বি পি এফৰ প্ৰতিস্থাপক সাধাৰণ সম্পাদক ইমানুৱেল মুছাহাৰীয়ে
