বৰপেটা, 28 আগষ্টঃ বৰপেটা সত্ৰৰ ডেকাসত্ৰীয়া বাপজনা নৱজিৎ দাসৰ দেহাৱসানক লৈ এতিয়াও শোকস্তব্ধ পৰিৱেশে বিৰাজ কৰিছে সত্ৰনগৰী বৰপেটাত ৷ আনহাতে, তেখেতৰ মৃত্যুৰ লগতে তেখেতৰ পৰিয়ালটো সম্প্ৰতি সন্মুখীন হৈছে আন এক ভয়াৱহ সংকটৰ ৷ বিশেষকৈ ডেকাসত্ৰীয়া বাপজনাৰ চিকিৎসাৰ বাবে ঋণগ্ৰস্ত হৈ পৰা পৰিয়ালটোৱে এই বৃহৎ ধনৰাশি পৰিশোধ কৰাক লৈ চিন্তিত হৈ পৰিছে ৷
উল্লেখ্য যে, বৰপেটা সত্ৰৰ ডেকাসত্ৰীয়া নৱজিৎ দাস বাপজনাৰ বাইপাছ চাৰ্জাৰীৰ চিকিৎসাৰ ব্যয় ৰাজ্য চৰকাৰে বহন কৰাৰ কথা প্ৰকাশ কৰিছিল মুখ্যমন্ত্ৰী সৰ্বানন্দ সোণোৱালে ৷ কিন্তু শেষলৈকে তেখেতৰ চিকিৎসাৰ ব্যয় বহন নকৰিলে ৰাজ্য চৰকাৰে ৷ যাৰ ফলত তেখেতক মুকলি কৰি দিয়াৰ পিছতো ধনৰ অভাৱত চিকিৎসালয়ৰ পৰা উলিয়াই আনিবলৈ অসমৰ্থ হৈছিল পত্নী ৷ নাৰ্চিং হোম কৰ্তৃপক্ষৰ লগতে, ডাঃ তন্ময় দাস আৰু বিভিন্নজনৰ আৰ্থিক সহায়ত প্ৰায় 10 লাখ টকাৰ ঋণ পৰিশোধ কৰি তেখেতক ঘৰলৈ ওভটাই অনা হৈছিল ৷
কিন্তু সম্প্ৰতি এই বৃহৎ অংকৰ ধন পৰিশোধৰ ক্ষেত্ৰত সমস্যাৰ সন্মুখীন হৈছে তেখেতৰ পত্নী ৷ সেয়েহে এইক্ষেত্ৰত চৰকাৰক নিজৰ প্ৰতিশ্ৰুতি পূৰ্ণৰ বাবে আহ্বান জনাইছে তেখেতৰ পত্নীয়ে ৷ লগতে আজীৱন সত্ৰীয়া সংস্কৃতিৰ সাধনাত ব্ৰতী ডেকাসত্ৰীয়া বাপজনাৰ পৰিয়ালটোক শিল্পী পেঞ্চনৰ ব্যৱস্থা কৰিদিবলৈও চৰকাৰক আহ্বান জনাইছে ৷
লগতে পঢ়ক-হোজাইত পঞ্চায়তত চৰকাৰী অনুদানৰ ঘৰ দিয়াৰ নামত দুৰ্নীতি
