বৰপেটা,13 অক্টোবৰ: বৰপেটা জিলাত ক্ৰমাৎ বৃদ্ধি পাইছে অপৰাধমূলক কাৰ্যকলাপ ৷ এইবাৰ জিলাখনৰ হাউলীৰ হাজীপাৰাত সংঘটিত হল এক নৃশংস হত্যাকাণ্ড ৷ পৰকীয় প্ৰেমৰ সন্দেহত বাঁহেৰে মৰিয়াই নিজ পত্নীক হত্যা কৰিলে পতিয়ে ৷ এই নৃশংস হত্যাকাণ্ডটো সংঘটিত হৈছে হাউলীৰ হাজিপাৰাত ৷ ঘটনা অনুসৰি শনিবাৰে নিশা প্ৰায় ২ বজাত বজাত শোৱনি কোঠাত নিজ পত্নী চুফিয়া খাতুনক বাঁহেৰে কোবাই হত্যা কৰে ছহিদুল ইছলাম নামৰ এজন ব্যক্তিয়ে ৷
প্ৰায় 15 বছৰ পূৰ্বে একে গাঁৱৰে ছহিদুল ইছলামৰ সৈতে বিবাহপাশত আবদ্ধ হৈছিল চুফিয়া খাতুন নামৰ মহিলা গৰাকী ৷ বিবাহৰ চিনস্বৰূপে তেওঁলোকৰ মাজত দুটি সন্তানো আছে ৷ প্ৰত্যক্ষদৰ্শীয়ে জনোৱা অনুসৰি যোৱা নিশা মহিলাগৰাকী শুই থকা অৱস্থাত বাঁহেৰে পেটত আক্ৰমণ কৰি পত্নীক হত্যাৰ চেষ্টা চলাই অভিযুক্ত স্বামী ছহিদুল ইছলামে ৷ লগে গলে মহিলাগৰাকীয়ে ঘৰৰ দৰ্জা খুলি ঘৰৰ বাহিৰলৈ দৌৰি ওলাই আহি চোতালত পৰি যায় ৷
ঘটনাৰ পাছতে মহিলাগৰাকীৰ চিঞৰত ঘৰৰ কাষৰ লোকসকল ওলাই আহি মহিলাগৰাকীক উদ্ধাৰ কৰি হাউলী চিকিৎসালয়লৈ লৈ আহে যদিও মহিলাগৰাকীক চিকিৎসকে মৃত ঘোষণা কৰে ৷ ইয়াৰ পাছতে হত্যাৰ অভিযোগত স্বামী ছহিদুল ইছলামৰ লগতে শহুৰ ৰহিম আলীকো গ্ৰেপ্তাৰ কৰে আৰক্ষীয়ে ৷ ইফালে আৰক্ষীৰ জেৰাত পত্নীক পেটত বাঁহেৰে খুচি হত্যা কৰাৰ কথা স্বীকাৰ কৰিছে পাষাণ স্বামী ছহিদুলে ৷
এইদৰে পৰকীয়া প্ৰেমৰ সন্দেহত নিজ পত্নীক নৃশংস ভাৱে হানিখুচি হত্যা কৰা স্বামী ছহিদুলক দৃষ্টান্তমূলক শাস্তিৰ দাবী জনাইছে নিহত চুফিয়া খাতুনৰ পৰিয়ালে ৷
