বৰপেটা, ২৫ জানুৱাৰীঃ শুকুৰবাৰৰ পৰা বৰপেটাত আৰম্ভ হৈছে তৃতীয় গ্ৰন্থ উৎসৱ ৷ "আমি বৰপেইটা ফেচবুক ফ'ৰাম"ৰ উদ্যোগত শুকুৰবাৰৰ পৰা বৰপেটাত অনুষ্ঠিত হয় গ্ৰন্থ উৎসৱ ৷ বৰপেটা পৌৰ সভাৰ খেলপথাৰত অনুষ্ঠিত গ্ৰন্থ উৎসৱ উপলক্ষে অনুষ্ঠিত উদ্ধোধনী সভাত অংশগ্ৰহন কৰে বিশিষ্ঠ সাহিত্যিক ধ্ৰুৱজ্যোতি বৰা, থানেশ্বৰ মালাকাৰকে ধৰি কেবাজনো বিশিষ্ঠ ব্যক্তিয়ে ৷ উদ্ধোধনী সভাতে সাহিত্যিক ড৹ ধ্ৰুৱজ্যোতি বৰাই উন্মোচন কৰে গ্ৰন্থ উৎসৱৰ স্মৃতিগ্ৰন্থ 'হাৰিজান' ৷
আনহাতে, এই সভাতে বিশিষ্ঠ লেখক তথা অসামৰিক প্ৰশাসনীয় সেৱাৰ বিষয়া তথা বৰপেটাৰ অৱসৰপ্ৰাপ্ত উপায়ুক্ত থানেশ্বৰ মালাকাৰে উন্মোচন কৰে লেখক অমিয় কুমাৰ দাসৰ গল্প সংকলন "ট্ৰেন্সজেনিক সপোন" ৷ গ্ৰন্থ উৎসৱৰ সৈতে সংগতি ৰাখি আয়োজক সমিতিয়ে বৰপেটাৰ এগৰাকী প্ৰখ্যাত শাস্ত্ৰীয় সংগীতশিল্পী তথা শিক্ষক সত্যকৃষ্ণ মিশ্ৰক প্ৰদান কৰে বৰপেটা ৰত্ন বঁটা ৷ তৃতীয়বাৰৰ বাবে আয়োজিত গ্ৰন্থ উৎসৱত বৰপেটাৰ মহীৰূহ গোকুল পাঠকক প্ৰথমবাৰৰ বাবে "বৰপেটা বঁটা" প্ৰদান কৰাৰ পিচত বৰপেটাৰ সংগীত জগতৰ মধ্যমনি, শাস্ত্ৰীয় সংগীতৰ ভোটাতৰাসদৃশ সত্যকৃষ্ণ মিশ্ৰক "বৰপেটা ৰত্ন" বঁটা প্ৰদান কৰে ৷ এক গাম্ভীৰ্যপূৰ্ণ অনুষ্ঠানত এই বঁটা প্ৰদান কৰে সাংবাদিক নিতুমনি শইকীয়াই ৷
আনহাতে, বৰপেটাৰ সৰ্বজন শ্ৰদ্ধেয় বয়োজ্যেষ্ঠ সংগীত শিল্পীগৰাকীয়ে নিতুমনি শইকীয়াৰ হাতৰ পৰা এই বঁটা গ্ৰহন কৰিবলৈ পাই অতি আনন্দিত হোৱা বুলি অনুভৱ ব্যক্ত কৰে ৷ তাৰোপৰি "আমি বৰপেইটা ফেচবুক ফ'ৰাম" ৰ উদ্যোগত তৃতীয়বাৰৰ বাবে অনুষ্ঠিত হোৱা গ্ৰন্থ উৎসৱত অংশগ্ৰহন কৰি প্ৰতিদিন টাইমৰ মুখ্যসম্পাদক নিতুমনি শইকীয়াই গ্ৰন্থ উৎসৱৰ এই আয়োজনক লৈ সন্তুষ্টি প্ৰকাশ কৰে ৷ ফেচবুকৰ জৰিয়তে হৈ থকা সকলো শুভ আৰু ইতিবাচক কামৰ ভিতৰত বৰপেটা গ্ৰন্থ উৎসৱো এটা অন্যতম উদাহৰণ বুলি অভিহিত কৰে প্ৰতিদিন টাইমৰ মুখ্য সম্পাদকগৰাকীয়ে ৷ বৰপেটা ফেচবুক ফ'ৰামে গ্ৰন্থ উৎসৱ অনুষ্ঠিত কৰাৰ লগতে দ্বিতীয়বাৰৰ বাবে সত্যকৃষ্ণ মিশ্ৰক বৰপেটা ৰত্ন বঁটা প্ৰদান অত্যন্ত ইতিবাচক দিশ বুলি অভিহিত কৰে ৷ অকল বৰপেটা ফেচবুক ফ'ৰামৰ বাবেই নহয়, এয়া ফেচবুকৰ জৰিয়তে সাহিত্য চৰ্চা কৰা সকলোৰে বাবে এটা যোগাত্মক দিশ বুলিও উল্লেখ কৰে ৷ এনে কামৰ জৰিয়তে মানুহে সৃষ্টিমুলক কাম কৰিবলৈ সাহস লাভ কৰে বুলিও উল্লেখ কৰে নিতুমনি শইকীয়াই ৷
আৰু পঢ়কঃ বিটিএডিত হাগ্ৰামা মহিলাৰীৰ নেতৃত্বত গঠন হোৱা চুক্তি "মৰণফান্দ" চুক্তিঃ এবিএমছু
