বৰপেটা, ৭ জুলাইঃ আপুৰুগীয়া সম্পদ সমূহৰ সংৰক্ষণৰ অভাৱত ৰাজ্যৰ বহু সম্পদ নষ্ট হোৱা পৰিলক্ষিত হৈছে ৷ চৰকাৰী অৱহেলা আৰু দায়িত্বহীনতাৰ পৰিৱৰ্তে ৰাজ্যখনৰ আপুৰুগীয়া সম্পদ সমূহৰ উপযুক্ত সংৰক্ষণৰ বাবে আগবাঢ়ি আহিছে টাটা ট্ৰাষ্ট ৷ বাংগালোৰস্থিত ইণ্ডিয়া ফাউণ্ডেছন ফৰ দা আৰ্ট নামৰ সংস্থাটোৱে টাটা ট্ৰাষ্টৰ সহযোগত নষ্ট হৈ যাব যাবলৈ লোৱা সম্পদ সমূহৰ উপযুক্ত সংৰক্ষণৰ বাবে গ্ৰহণ কৰিছে বিশেষ আঁচনি ৷ এই আঁচনিৰ অধীনত বৰপেটা জিলা সংগ্ৰহালয়ত দেওবাৰে এটা নতুন কলা বীথিকা মুকলি কৰে বৰপেটাৰ বিধায়ক গুণীন্দ্ৰ নাথ দাসে ৷ অতি উন্নতভাৱে সজোৱা কলা বীথিকাটোত আপুৰুগীয়া আৰু ঐতিহাসিক কলা সম্পদসমূহ প্ৰদৰ্শিত কৰাৰ ব্যৱস্থা হাতত লোৱা হৈছে ৷ এই অনুষ্ঠানত বৰপেটা সত্ৰৰ বুঢ়াসত্ৰীয়া বশিষ্ঠ শৰ্মাৰ লগতে সংগ্ৰহালয় বিষয়া কৰ্মচাৰীসকলেও অংশগ্ৰহণ কৰে ৷
ইপিনে কলা বীথিকা মুকলি কৰি বৰপেটাৰ বিধায়ক গুণীন্দ্ৰ নাথ দাসে সংৰক্ষণৰ অভাৱত ৰাজ্যৰ বহু আপুৰুগীয়া সম্পদ ক্ৰমাৎ নষ্ট হৈ যোৱা বুলি আক্ষেপ কৰে ৷ আনকি বৰপেটাৰ লগতে বহু জিলাত স্থায়ী সংগ্ৰহালয় ভৱন নাই বুলি উল্লেখ কৰি প্ৰতিখন জিলাত স্থায়ী সংগ্ৰহালয় ভৱন নিৰ্মাণৰ ব্যৱস্থা ল'বলৈ ৰাজ্যৰ মুখ্যমন্ত্ৰী সৰ্বানন্দ সোণোৱালক দাবী জনায় ৷
