বাক্সা, 26 নৱেম্বৰঃ বাংগালুৰুত উদ্ধাৰ বাক্সাৰ তিনি কিশোৰী ৷ মানৱ সৰবৰাহকাৰী চক্ৰৰ জালত পৰি বাংগালুৰুলৈ যোৱা বৃহত্তৰ নাগ্ৰীজুলিৰ তিনি কিশোৰীক বাংগালুৰুৰ 'তালাচ' নামৰ এটা স্বেচ্ছাসেৱী সংস্থাই উদ্ধাৰ কৰে ৷ কিশোৰীগৰাকীক উদ্ধাৰ কৰি স্বেচ্ছাসেৱী সংস্থাটোৱে বাংগালুৰুস্থিত CWCৰ হাতত গতাই দিয়ে ৷ তেওঁলোকে কিশোৰীকেইগৰাকীৰ সঠিক পৰিচয় সংগ্ৰহ কৰি বাক্সা আৰক্ষীৰ লগত যোগোযোগ কৰি ঘটনাটো অৱগত কৰে ৷ বাক্সা আৰক্ষীয়ে তামুলপুৰ আৰক্ষী আৰু নাগ্ৰীজুলি আৰক্ষীৰ সহযোগত তদন্ত কৰি কিশোৰী কেইগৰাকীৰ পৰিয়ালৰ সৈতে যোগাযোগ কৰি পৰিয়াল সমূহ চিনাক্ত কৰে ৷
উল্লেখ্য যে যোৱা 18 নৱেম্বৰত তামুলপুৰ আৰু নাগ্ৰীজুলিৰ পৰা এটা আৰক্ষীৰ দল বাংগালুৰুলৈ ৰাওনা হয় আৰু CWCৰ লগত যোগাযোগ কৰি কিশোৰী কেইগৰাকীক বাংগালুৰুৰ পৰা উদ্ধাৰ কৰি তামুলপুৰ থানালৈ লৈ আনে ৷ কিশোৰী কেইগৰাকীৰ ভাষ্য অনুসৰি তামুলপুৰ আৰক্ষীয়ে শুক্লা দাস নামৰ লোক এজনৰ বিৰুদ্ধে তামুলপুৰ আৰক্ষী থানাত এটা গোচৰ ৰুজু কৰে ৷ আনহাতে তামুলপুৰ আৰক্ষী থানাৰ ভাৰপ্ৰাপ্ত আৰক্ষী বিষয়া অসীম বৰাই উল্লেখ কৰা মতে শুক্লা দাস বৰ্তমান পলাতক অৱস্থাত আছে যদিও আৰক্ষীয়ে তদন্ত অব্যাহত ৰাখিছে ৷
আৰু পঢ়কঃ তিনিচুকীয়াৰ মুনিনৰ 'প্ৰজ্ঞা'
