স্পৰ্টছ ডেস্ক,১১ জুলাই : ১২ জুলাইৰ পৰা ভাৰত আৰু ৱেষ্ট ইণ্ডিজৰ মাজত অনুষ্ঠিত হ'ব টেষ্ট শৃংখলা । দুখন টেষ্টৰ শৃংখলাৰ বাবে দুয়োটা দল সাজু হৈ উঠিছে । বিশ্বকাপৰ কোৱালিফায়াৰত বিমুখ হোৱা ৱেষ্ট ইণ্ডিজে বিশ্ব ক্ৰিকেটত নিজৰ অস্তিত্ব দেখুৱাবলৈ এই টেষ্টৰ জৰিয়তে যথেষ্ট চেষ্টা চলাব । আনহাতে ভাৰতৰ সন্মুখতো কেইবাটাও প্ৰত্যাহ্বান আছে ।
ভাৰতৰ টেষ্টৰ টপ অৰ্ডাৰ চেতেশ্বৰ পূজাৰাৰ প্ৰস্থানে সমস্যাত পেলাইছে ভাৰতীয় দলটোক । টেষ্ট অভিষেকৰ আশাত থকা যশস্বী জয়ছোৱালক প্লেইং ১১ত স্থান দিয়াৰ চিন্তা চৰ্চা কৰিছে যদিও চেতেশ্বৰ পূজাৰাৰ স্থান কোনে ল'ব সেয়াহে ডাঙৰ প্ৰশ্ন হৈছে । যদিও যশস্বী জয়ছোৱালক পূজাৰাৰ বিকল্প হিচাপে ৩ নম্বৰত খেলোৱাটো একেবাৰে সহজ সিদ্ধান্ত কিন্তু প্ৰাৰম্ভিক বেটছমেন শুভমন গিলৰ কথাও চিন্তা কৰিছে দলটোৱে । কাৰণ স্বাভাবিকভাৱে শুভমন গিল মিডল অৰ্ডাৰত অধিক স্বচ্ছন্দ । ইফালে ২১ বছৰীয়া জয়ছোৱালে সাধাৰণতে ৰঙা বলৰ ক্ৰিকেটত মুম্বাই, পশ্চিম মণ্ডল আৰু অৱশিষ্ট ভাৰতৰ হৈ অপেনিং কৰি কৰিছে ।
অৱশ্যে নিজকে ভাল স্থানত ৰাখিবলৈ ৩ নম্বৰটো জয়ছোৱালৰ বাবে বেয়া নহ'ব । কেমাৰ ৰোচ, শ্যানন গেব্ৰিয়েল, আলাজাৰি জোচেফ আৰু জেচন হোল্ডাৰৰ দৰে অভিজ্ঞ বলাৰসকলৰ সন্মুখীন হোৱাটো জয়ছোৱালৰ গুৰুত্বপূৰ্ণ হ'ব । কিয়নো বছৰটোৰ শেষৰফালে দক্ষিণ আফ্ৰিকা আৰু ২০২৪-২৫ত শীতকালত শক্তিশালী অষ্ট্ৰেলিয়ানসকলৰ তেওঁ কেনেকৈ মুখামুখি হ'ব লাগিব তাৰ এক ইংগিত লাভ কৰিব । ভাৰতৰ নতুন বিশ্ব টেষ্ট চেম্পিয়নশ্বিপ চাৰ্কলটো আগৰ দুটা সংস্কৰণৰ তুলনাত কঠিন হ'ব বুলিও ধাৰণা কৰা হৈছে ।
আঘাতপ্ৰাপ্ত যশপ্ৰীত বুমৰাহৰ অনুপস্থিতি, মহম্মদ ছামীৰ এই শৃংখলাৰ পৰা বিশ্ৰাম আদিয়ে ভাৰতীয় দলটোক কিছু সমস্যাত পেলাব পাৰে । পূৰ্বে দলৰ অংশ হোৱা ইশান্ত শৰ্মা এতিয়া ঘোষক হ'ব আৰু ৩৬ বছৰীয়া উমেশ যাদৱে হেমষ্ট্ৰিঙৰ আঘাতৰ পৰা আৰোগ্য হোৱাৰ পাছত পুনৰ খেলত মনোনিৱেশ কৰাটো কিছু কঠিন হ'ব পাৰে ।
সেয়েহে মহম্মদ চিৰাজ আৰু শাৰ্দুল ঠাকুৰৰ নেতৃত্বৰ ৫ জনীয়া বলাৰৰ দলটো ৱেষ্ট ইণ্ডিজৰ পেচ আক্ৰমণৰ তুলনাত অভিজ্ঞতাৰ ক্ষেত্ৰত সঁচাকৈয়ে ক্ষীণ দেখা গৈছে । ৱেষ্ট ইণ্ডিজে ৰবিচন্দ্ৰন অশ্বিন আৰু ৰবীন্দ্ৰ জাদেজাৰ সন্মুখীন কেনেদৰে হ'ব সেয়া সময়ে ক'ব । ৪ জন বলাৰৰ বাবে মুকেশ কুমাৰ, জয়দেৱ উনাদকট আৰু নৱদীপ চাইনীৰ মাজৰ এজনক বাছনি কৰাটো সহজ নহ'ব পাৰে । একেদৰে, দুজন স্পিনাৰ থকাৰ সমান্তৰালকৈ উইকেটকীপাৰ কোনা শ্ৰীকৰ ভৰত হ'ব নে ঈশান কিষাণ ?
স্কোৱাড
ভাৰত : ৰোহিত শৰ্মা (অধিনায়ক), শুভমন গিল, ৰুতুৰাজ গায়কৱাড়, বিৰাট কোহলি, যশস্বী জয়ছোৱাল, আজিংক্য ৰাহানে (উপ-অধিনায়ক), কে এছ ভৰত (উইকেট কীপাৰ), ঈশান কিষাণ (উইকেট কীপাৰ), ৰবিচন্দ্ৰন অশ্বিন, ৰবীন্দ্ৰ জাদেজা, শাৰ্দুল ঠাকুৰ, অক্সৰ পেটেল, মহম্মদ চিৰাজ, মুকেশ কুমাৰ, জয়দেৱ উনাদকট, নৱদীপ চাইনী ।
ৱেষ্ট ইণ্ডিজ : ক্ৰেগ ব্ৰেথৱেট (অধিনায়ক), জাৰ্মাইন ব্লেকউড (উপ অধিনায়ক), জশুআ দা চিলভা (উইকেট কীপাৰ), আলিক আথানাজে, ৰাহকিম কৰ্ণৱাল, শ্যানন গেব্ৰিয়েল, জেচন হোল্ডাৰ, আলজাৰি জোচেফ, ৰেমন ৰেইফাৰ, কেমাৰ ৰোচ, টেগেনাৰিন চন্দ্ৰপল, কিৰ্ক মেকেঞ্জি, জোমেল ৱাৰিকন ।
লগতে পঢ়ক :IND vs WI 2023 : ৱেষ্ট ইণ্ডিজৰ বিৰুদ্ধে টেষ্ট কেৰিয়াৰ আৰম্ভ কৰিব জয়ছোৱালে !
