স্পৰ্টছ ডেস্ক,৭ জুলাই : ভাৰত আৰু ৱেষ্ট ইণ্ডিজৰ মাজত অনুষ্ঠিত হ'বলগীয়া টেষ্ট মেচত যুৱ বেটছমেন যশস্বী জয়ছোৱালক দেখা পোৱাৰ সম্ভাৱনা আছে । জয়ছোৱালে এই মেচখনত টেষ্ট কেৰিয়াৰ আৰম্ভ কৰাৰ সম্ভাৱনা আছে । ১২ জুলাইৰ পৰা আৰম্ভ হ'বলগীয়া টেষ্ট শৃংখলাটোত তেওঁৰ স্থান প্ৰায় নিশ্চিত যেন অনুভৱ হৈছে । কিয়নো শেহতীয়াকৈ অনুশীলন মেচত ৰোহিত শৰ্মাৰ সৈতে তেওঁৰ অপেনাৰ যুটি প্ৰশংসনীয় আছিল । টেষ্ট মেচখনত যশস্বী জয়ছোৱালৰ সম্ভাৱ্য পদাৰ্পণ আৰু চেতেশ্বৰ পূজাৰাৰ স্থান পূৰণ কৰাৰ পৰিপ্ৰেক্ষিতত ভাৰতীয় ক্ৰিকেট দলত কিছু বৃহৎ পৰিৱৰ্তন দেখা যাব পাৰে ।
ভাৰত আৰু ৱেষ্ট ইণ্ডিজৰ মাজত অনুষ্ঠিত হ'বলগীয়া টেষ্ট শৃংখলাত যুৱ বেটছমেন যশস্বী জয়ছোৱাল আৰু ৰোহিত শৰ্মাক বাওঁ-সোঁহাতৰ সংমিশ্ৰণৰ সৈতে অপেনাৰ হিচাপে দেখা যাব পাৰে ! আনহাতে শুভমান গিলক পুজাৰাৰ খালী স্থান পূৰণ কৰি তিনি নম্বৰত থাকিব পাৰে ।
ভাৰতীয় ক্ৰিকেট দলে ১৬ গৰাকী খেলুৱৈৰ উপৰিও স্থানীয় ক্ৰিকেটাৰসকলৰ সৈতে ২ দিনীয়া অনুশীলন মেচ খেলিছিল । য'ত যশস্বী জয়ছোৱালে ৰোহিত শৰ্মাৰ সৈতে আৰম্ভণি কৰাৰ সময়ত এটা ভাল ইনিংছ খেলিছে । এই সময়ছোৱাত, তেওঁ ৭৬ টা বলত ৫৪ ৰাণ সংগ্ৰহ কৰিছিল । ইয়াৰ লগতে, ৰোহিত শৰ্মাই ৬৭ টা বল খেলি অৱসৰ লয় । এনে প্ৰদৰ্শনে জয়ছোৱালৰ আগমনৰ ইংগিত দিছে ।
যদি পৰিচালনা দলে যুৱ বেটছমেন যশস্বী জয়ছোৱালক অপেনাৰ হিচাপে বেটিং কৰাৰ সুযোগ দিয়ে, তেন্তে নিয়মীয়া অপেনাৰ হিচাপে খেলি থকা শুভমান গিলে তিনি নম্বৰত বেটিং কৰিবলৈ আহিব লাগিব আৰু তাৰ পাছত বিৰাট কোহলীক চাৰি নম্বৰত বেটিং কৰা দেখা যাব । পাঁচ নম্বৰত আজিংক্য ৰাহানে আৰু ছয় নম্বৰত ঈশান কিষাণে উইকেটকিপাৰ বেটছমেন হিচাপে ইনিংছ আৰম্ভ কৰিব পাৰে ।
ঋষভ পন্তৰ বিকল্প হিচাপে ঈশান কিষাণক উইকেটকীপাৰ বেটছমেন হিচাপে দলত দেখাৰ সম্ভাৱনা আছে । তেওঁক প্ৰথম টেষ্টত প্লেয়িং ইলেভেনৰ অংশ কৰিব পাৰে । এনে পৰিস্থিতিত, উইকেটকীপাৰ কে.এছ. ভৰত দলৰ বাহিৰত বহিব বুলি প্ৰায় নিশ্চিত হৈছে । কে.এছ. ভৰতে উইকেটকীপিং ভাল কৰিলেও বেটেত বিফল হৈছে । এতিয়ালৈকে খেলা পাঁচখন টেষ্ট মেচত ভৰতে এটাও অৰ্ধশতক কৰিব পৰা নাই । একে সময়তে, বাওঁহাতৰ বেটছমেন ঈশান কিষাণৰ বেটিং শৈলী পন্তৰ দৰে বুলি গণ্য কৰা হয় । দলত স্থান পোৱাৰ প্ৰতিযোগিতাত ৰুতুৰাজ গায়কোৱাড়তকৈও যশস্বী জয়ছোৱাল আগবাঢ়ি আছে ।
লগতে পঢ়ক :IND vs WI 2023 : ৱেষ্ট ইণ্ডিজৰ বিৰুদ্ধে ১৫ জনীয়া ভাৰতীয় দল ঘোষণা
