স্পৰ্টছ ডেস্ক, 15 নৱেম্বৰ: আই পি এলৰ সফলতাৰ শিখৰত থকা দলৰ ভিতৰত অন্যতম মুম্বাই ইণ্ডিয়ানছৰ পৰা অব্যাহতি 12 গৰাকীকৈ খেলুৱৈক ৷ য’ত নাম অন্তৰ্ভুক্ত হৈছে যুৱৰাজ সিঙৰ ৷ যুৱৰাজৰ সৈতে আছে ইভিন লুইছ, এডম মিল্নে, জেছন বেহৰনড্ৰফ, বৰিন্দৰ চৰণ, বেন কাটিং, পংকজ জায়ছৱাল, ৰছিখ সলাম, অল্জাৰী জোছেফ, ব্যুৰ’ন হেন্ড্ৰিক্স, ময়ংক মাৰ্কন্দে আৰু জছৱাল ছিড্ডেছ লাড ৷
চাৰিবাৰৰ আই পি এল চেম্পিয়ন মুম্বাই দলটোৰ সৈতে বিগত বছৰ এক কোটি টকাত চুক্তিবদ্ধ কৰা হৈছিল যুৱৰাজ সিঙক ৷ কিন্তু কেৱল চাৰিখন মেচতে অংশগ্ৰহণ কৰিছিল যুৱৰাজে ৷ 2019 আই পি এল ছিজনত 98 ৰান কৰিবলৈ সক্ষম হৈছিল যুৱৰাজে ৷ ইতিমধ্যে আন্তঃৰাষ্ট্ৰীয় ক্ৰিকেটৰ পৰা অৱসৰ লৈছে খেলুৱৈগৰাকীয়ে ৷ যাৰ বাবে এতিয়া আই পি এল কেৰিয়াৰ অন্ত পৰিছে বুলি অনুমান কৰা হৈছে ৷ যুৱৰাজে নিজৰ আই পি এল কেৰিয়াৰত 132 খন মেচত অংশগ্ৰহণ কৰি 129.72 ষ্ট্ৰাইক ৰেটেৰে 2750 ৰান কৰিবলৈ সক্ষম হৈছে ৷ য’ত আছে 13 টা কৈ অৰ্ধশতক ৷
