স্পৰ্টছ ডেস্ক, 18 জুনঃ কৰ'ণা ভাইৰাৰ সংক্ৰমণৰ ভয়াৱহতাৰ প্ৰতি লক্ষ্য ৰাখি আইচিচিৰ দ্বাৰা বলত থু অথবা চালাইভা ব্যৱহাৰৰ নিষেধাজ্ঞা জাৰি কৰাৰ পাচতেই অব্যাহত আছে বিভিন্ন লোকৰ বিভিন্ন প্ৰতিক্ৰিয়া । এই সন্দৰ্ভত শেহতীয়াকৈ প্ৰতিক্ৰিয়া প্ৰকাশ কৰিছে ভাৰতৰ বেগী বলাৰ উমেশ যাদৱে ।
উমেশ যাদৱে এক সাক্ষাৎকাৰত কৈছে, থুৰ অবিহনে অকস্মাতে খেলিবলৈ কিছু অসুবিধাৰ সৃষ্টি হ'ব । আমি এতিয়ালৈ অনুশীলন আৰম্ভ কৰা নাই । এবাৰ খেল পথাৰত নামিবলৈ সক্ষম হলেই, থুৰ অবিহনে বল কৰাৰ অনুশীলন আৰম্ভ কৰিলে তেতিয়া বুজি উঠিম ইয়াৰ কি প্ৰভাৱ পৰিব । মই নাজানো থু নিষিদ্ধৰ পাচত কিমান উজ্বল হৈ থাকিব বলটো ।
তেওঁ লগতে কয়, এদিনীয়া ক্ৰিকেটৰ বলটো যিহেতু কম চুইং হয় । সেয়ে টি-20 ক্ৰিকেটৰ বাবে উত্তম । কিন্তু আচল প্ৰত্যাহ্বান তেতিয়া সৃষ্টি হ'ব যেতিয়া টেষ্ট ক্ৰিকেটত অৱতীৰ্ণ হ'ম । যদি থুৰ ব্য়ৱহাৰত নিষেধাজ্ঞা দিয়া হৈছে তেন্তে চুইং লাভৰ বাবে অন্য বিকল্পৰ চিন্তা কৰাৰ প্ৰয়োজন । এবাৰ অনুশীলন আৰম্ভ কৰাৰ পাচত হে জানিবলৈ সক্ষম হ'ম কেনেকৈ ইয়াৰ সমাধান কৰিব লাগিব ।
আনহাতে লক ডাউনৰ পাচত দীৰ্ঘসময়ৰ বিৰতিৰ পাচত বলিং আৰু ফিল্ডিং কৰাত কিছু অসুবিধাৰ সৃষ্টি হ'ব বুলি কয় খেলুৱৈগৰাকীয়ে । 2011 চনত মহেন্দ্ৰ সিং ধোনীৰ নেতৃত্বত কেৰিয়াৰ আৰম্ভ কৰা উমেশ যাদৱে ভাৰতৰ হৈ বৰ্তমানলৈকে 46 খন টেষ্ট, 75খন এদিনীয়া আৰু 7 খন আন্তঃৰাষ্ট্ৰীয় টি-20 মেচত অংশ গ্ৰহণ কৰিছে ।
আনহাতে আইপিএল আয়োজনৰ সন্দৰ্ভত খেলুৱৈগৰাকীয়ে কয়, নিশ্চিত ভাৱে আইপিএলৰ আয়োজন হ'ব কাৰণ ইয়াৰ দ্বাৰা আন্তঃৰাষ্ট্ৰীয় ক্ৰিকেটত প্ৰত্যাৱৰ্তনৰ পূৰ্বে অনুশীলনৰ এটা উপযুক্ত মঞ্চ পোৱা যাব ।
