স্পৰ্টছ ডেস্ক, 7 ফেব্ৰুৱাৰীঃ দক্ষিণ আফ্ৰিকাত অনুষ্ঠিত হোৱা 19 অনুৰ্ধ্ব ক্ৰিকেট বিশ্বকাপত ইতিহাস ৰচিলে বাংলাদেশ ক্ৰিকেট দলে ৷ ছেমিফাইনেলত নিউজিলেণ্ডক পৰাস্ত কৰি পোন প্ৰথমবাৰৰ বাবে ফাইনেলত প্ৰৱেশ কৰিলে বাংলাদেশে ৷
বৃহস্পতিবাৰে ছেনৱেছ পাৰ্কত অনুষ্ঠিত মেচখনত নিউজিলেণ্ডে প্ৰথমে বেটিং কৰি নিৰ্ধাৰিত 50 অভাৰত 8 টা উইকেটৰ বিনিময়ত সংগ্ৰহ কৰে 211 ৰান ৷ নিউজিলেণ্ডৰ হৈ বি.হুইলাৰ গ্ৰীনালে সৰ্বাধিক অপৰাজিত 75 ৰান কৰাৰ বিপৰীতে এন লিডষ্টনে 44 ৰানৰ বৰঙণি দিয়ে ৷ বাংলাদেশৰ হৈ শ্বৰিফুল ইছলামে 3 টা উইকেট দখল কৰে ৷ ইয়াৰ প্ৰত্যুত্তৰত বাংলাদেশে মহমুদুল হাছান জয়ৰ শতকৰ জৰিয়তে 44.1 অভাৰতেই 4 টা উইকেট হেৰুৱাই লক্ষ্যত উপনীত হয় ৷
![মহমুদুল হাছান জয়ৰ শতক](https://etvbharatimages.akamaized.net/etvbharat/prod-images/5984754_mahmudul-hasan-joy.jpg)
এতিয়া দেওবাৰে ফাইনেলত ভাৰতৰ বিৰুদ্ধে মুখামুখি হ’ব বাংলাদেশ ৷ এই বৰ্ষৰ 19 অনুৰ্ধ্ব ক্ৰিকেট বিশ্বকাপত প্ৰথমবাৰৰ বাবে ভাৰতৰ বিৰুদ্ধে যুঁজত অৱতীৰ্ণ হ’ব বাংলাদেশ ৷ পাকিস্তানক পৰাস্ত কৰি ফাইনেলত প্ৰৱেশ কৰিবলৈ সক্ষম হৈছিল ভাৰত ৷