নিউজডেস্ক, 21 মে': কেদাৰনাথৰ গুহাত মোডীয়ে ধ্যান কৰাৰ দৃশ্য বৰ্তমান ভায়ৰেল হৈ পৰিছে ছ'চিয়েল মিডিয়াত ৷ ধ্যানৰ ফটো দি বৰ্তমান সমালোচনাৰ পাত্ৰ হৈ পৰিছে প্ৰধানমন্ত্ৰীগৰাকী ৷ নিজৰ ব্যতিক্ৰমী লিখনীৰ বাবে সকলোৰে মাজত জনপ্ৰিয় হোৱা অভিনেত্ৰী টুইংকল খান্নাইও প্ৰধান মন্ত্ৰীগৰাকীৰ ধ্যান কৰাক লৈ ৰাখিলে নিজৰ মন্তব্য ৷ ছ'ছিয়েল মিডিয়াযোগে নিজে ধ্যান কৰি থকাৰ এক ফটো শ্বেয়াৰ কৰাৰ লগতে মোডীক লৈ ব্যংগাত্মক পোষ্টো দিলে অভিনেত্ৰীগৰাকীয়ে৷
ইন্টাৰনেটত প্ৰধানমন্ত্ৰী মোডীৰ ধ্যানৰ ছবি ভায়ৰেল হৈ পৰাৰ পিচতেই টুইটাৰযোগে টুইংকল খান্নাই ব্যংগ কৰি কয় যে, বিয়াৰ ফটোগ্ৰাফীৰ পিচতেই বৰ্তমান আৰম্ভ হ'ব ধৰিছে এটা নতুন ট্ৰেণ্ড 'Meditation Photography-Poses and Angles' আৰু অতি শীঘ্ৰেই জনপ্ৰিয় হৈ পৰিব বিয়াৰ ফটো উঠাৰ দৰে ধ্যান কৰি ফটো উঠাৰ এই নতুন ধাৰাটো৷ উল্লেখ্য যে, টুইংকল খান্নাৰ স্বামী তথা অভিনেতা অক্ষয় কুমাৰৰ লগত প্ৰধানমন্ত্ৰী মোডীৰ এক সাক্ষাৎকাৰত টুইংকল খান্নাৰ সকলো টুইটাৰ পোষ্টেই পঢ়ো বুলি উল্লেখ কৰিছিল প্ৰধানমন্ত্ৰী গৰাকীয়ে৷
