নিউজ ডেস্ক,২৮ ফেব্ৰুৱাৰী: বিশেষভাৱে সক্ষম লোকৰ বাবে বিশেষ লেপটপ । পাঁচ বছৰৰ পৰিশ্ৰমৰ অন্তত এইবাৰ বজাৰত মুকলি হ'ল ব্ৰেইল লেপটপ । এতিয়াৰ পৰা দৃষ্টিহীনসকলেও ব্যৱহাৰ কৰিব পাৰিব লেপটপ ।
আই আই টি দিল্লীয়ে বুধবাৰে মুকলি কৰে "ডট বুক" নামৰ ভাৰতৰ এই প্ৰথমটো ব্ৰেইললেপটপ । সামাজিক কাম-কাজ তথা শিক্ষা আৰু নিয়োগৰ ক্ষেত্ৰত এই ডট বুকে নিশ্চয়কৈ দৃষ্টিহীনসকলৰ জীৱনত যোগাত্মক প্ৰভাৱ পেলাব বুলি আশাবাদী আই আই টি দিল্লীৰ অধ্যাপক বালাকৃষ্ণন ।
নইদাস্থিত ক্ৰিটিকেল চলিউচনছ ,চেন্নাইস্থিত ফোয়েনিক্স মেডিকেল ছিষ্টেম আৰু দিল্লীস্থিত ট্ৰাষ্ট আৰু ৱেলকাম ট্ৰাষ্টৰ সহযোগত আই আই টি দিল্লীয়ে নিৰ্মাণ কৰি উলিয়াছে "ডট বুক" নামৰ এই ব্ৰেইল লেপটপটো ।
এই লেপটপৰ দুটা সংস্কৰণ ইতিমধ্যে মুকলি কৰা হৈছে বজাৰত । মুকলি হোৱা প্ৰথম সংস্কৰণ "ডট বুক ২০ পি"ৰ বজাৰ মূল্য চল্লিছ হাজাৰ টকা আৰু দ্বিতীয় সংস্কৰণ "ডট বুক ৪০ কিউ"ৰ বজাৰ মূল্য ষাঠি হাজাৰ টকা ।
উল্লেখ্য যে, এই লেপটপত কোনো স্ক্ৰিণ নাথাকে । ইয়াত থকা ব্ৰেইল লাইনৰ সহায়তে কি-বোৰ্ড ব্যৱহাৰ কৰিব পাৰিব ব্যৱহাৰকাৰীয়ে।
