নগাঁও,চিৰাং,17 ডিচেম্বৰ: নাগৰিকত্ব সংশোধনী আইন বাতিলৰ দাবীত মঙলবাৰে নগাঁৱৰ নেহৰুৱালীত ছাত্ৰ সন্থাৰ উদ্যোগত আয়োজন কৰা হয় গণ সত্যাগ্ৰহ কাৰ্যসূচী ৷ গণ সত্যাগ্ৰহ কাৰ্যসূচীত নগাঁৱৰ বাঙালী সন্মিলনী,সাহিত্য সভা,শিখ সমাজ,প্ৰশাসন কৰ্মচাৰী সন্থা,শিল্পী,সাংবাদিকৰ লগতে কেইবাটাও চৰকাৰী বেচৰকাৰী সংস্থাই অংশগ্ৰহণ কৰে । প্ৰতিবাদকাৰীসকলে অসমৰ শান্তি সম্প্ৰীতি বিনষ্ট কৰিবলৈ কেন্দ্ৰই এই আইন প্ৰণয়ন কৰাৰ অভিযোগ উত্থাপন কৰি আইনখন কোনোপধ্যে মানি নোলোৱাৰ হুংকাৰ দিয়ে ৷
প্ৰতিবাদকাৰীসকলে নেহেৰুৱালীৰ পৰা নগাঁও চহৰৰ মাজেৰে কেইবা সহস্ৰাধিক লোকৰ এক বিশাল প্ৰতিবাদী সমদল উলিয়াই নগাঁও জিলা উপায়ুক্ত কাৰ্যালয়ৰ সন্মুখত উপস্থিত হৈ "হয় কা' বাতিল কৰক,নহ'লে আমাক গ্ৰেপ্তাৰ কৰক" শ্ল'গানেৰে পৰিৱেশ উত্তাল কৰি তোলে । নগাঁও জিলা ছাত্ৰ সন্থাৰ নেতৃত্বত যোৱা প্ৰতিবাদকাৰীসকলে জিলা উপায়ুক্তৰ জৰিয়তে প্ৰধানমন্ত্ৰীলৈ এক স্মাৰকপত্ৰও প্ৰেৰণ কৰে। লগতে নাগৰিকত্ব সংশোধনী আইন কাৰ্যকৰী হ'লে সমগ্ৰ মধ্য অসম বন্ধ দিয়াৰ হুংকাৰ দিয়ে প্ৰতিবাদকাৰীসকলে।
নাগৰিকত্ব সংশোধনী আইন বাতিলৰ দাবীত চিৰাংৰ বিভিন্ন স্থানত মঙলবাৰে অব্যাহত থাকে প্ৰতিবাদ ৷ চিৰাঙৰ বাসুগাঁওত সদৌ অসম ছাত্ৰ সন্থাই নাগৰিকত্ব সংশোধনী বিধেয়কৰ বিৰোধিতাত আক্ৰাছু, চিলাৰায় উন্নয়ন মঞ্চ,সূত্ৰধৰ ছাত্ৰ সন্থাকে আদি কৰি কেবাটাও সংগঠনৰ সহযোগত প্ৰতিবাদী সভা অনুষ্ঠিত কৰাৰ লগতে বাহিৰ কৰে প্ৰতিবাদী সমদল। চিৰাং বঙাইগাঁৱত এই আইনৰ বিৰুদ্ধে আমছুৰ চাৰিঘন্টীয়া অনশন কাৰ্যসূচী ৰূপায়ণ কৰে ৷ আনহাতে বঙাইগাঁও চহৰৰ মাজমজিয়াত শিল্পীসকলে একগোট হৈ গীত, কবিতাৰে বিৰোধিতা কৰে নাগৰিকত্ব সংশোধনী বিধেয়কৰ ৷ চৰকাৰে বলপূৰ্বকভাবে অসমবাসীৰ ওপৰত আইনখন জাপি দিব বিচাৰিলে প্ৰতিবাদকাৰীসকলে অনাগত দিনত তীব্ৰ আন্দোলন গঢ়ি তোলাৰ হুংকাৰ দিয়ে ৷
লগতে চাওকঃবুধবাৰৰ পৰা আৰম্ভ হ'ব সকলো ৰে'লৰ চলাচল
