চিটাৰা ডেস্ক, ১৮ আগষ্ট: বক্স অফিচৰ বাবে ছানী দেওলৰ ‘গদৰ ২’ ধুমুহাতকৈ কম নাছিল ৷ মুক্তিৰ লগে লগে ছবিখনে বহু অভিলেখ ভংগ কৰিছে । ছানী দেওলৰ ছবিখনে সমগ্ৰ দেশবাসীৰ পৰা যথেষ্ট মৰম লাভ কৰিছে ৷ ইয়াৰ পৰা ক’ব পাৰি যে ছানী দেওলৰ কেৰিয়াৰৰ শ্ৰেষ্ঠ ছবি হৈছে গদৰ আৰু গদৰ ২। ৭ দিনত ৩০০ কোটিৰো অধিক উপাৰ্জন কৰিছে ছবিখনে । একে সময়তে অক্ষয় কুমাৰৰ OMG ২ ছবিখনেও বক্স অফিচত ভাল ফলাফল লাভ কৰিছে । এক শক্তিশালী কাহিনীৰ ভিত্তিত অক্ষয় কুমাৰৰ OMG ২ য়ে ১০০ কোটি টকাৰ সীমা ইতিমধ্যেই অতিক্ৰম কৰিছে ।
বৰ্তমান বক্স অফিচত লেহেমীয়া হ’ল গদৰ ২ৰ গতি
বিশ্বৰ বিভিন্ন প্ৰান্তৰ পৰা ‘গদৰ ২’য়ে লাভ কৰা মৰম দেখি নিৰ্মাতাসকল অতিশয় আনন্দিত হৈছে । একে সময়তে বহুদিনৰ মূৰত ছানী দেওলে এখন ডাঙৰ হিট ছবি দৰ্শকক উপহাৰ দিছে । যদি আমি গদৰ ২ৰ উপাৰ্জনৰ পৰিসংখ্যা চাও, তেন্তে এই ছবিখন ২০২৩ চনৰ দ্বিতীয় সৰ্বাধিক উপাৰ্জন কৰা বলীউড ছবি হিচাপে পৰিগণিত হৈছে ।
গদৰ ২ য়ে অতিক্ৰম কৰিলে ৩০০ কোটি
গদৰ ২ মুক্তিৰ আজি ৭ দিন হ’ল । কিন্তু সপ্তম দিনৰ উপাৰ্জনৰ কথা যদি কওঁ, তেন্তে নিশ্চয়কৈ উপাৰ্জনৰ গতি সামান্য হ্ৰাস পাইছে । সপ্তমটো দিনত গদৰ ২ য়ে প্ৰায় ২২ কোটি টকা সংগ্ৰহ কৰিছে । এই সংখ্যাৰ লগে লগে ভাৰতত গদৰ ২ৰ মুঠ সংগ্ৰহ হয়গৈ ২৮৩.৩৫। একে সময়তে গদৰ ২ য়ে বিশ্বজুৰি ৩৩৮.৫ কোটি টকা উপাৰ্জন কৰিছে ।
ইফালে বক্স অফিচত ধীৰ গতিৰে চলি আছে অক্ষয়ৰ OMG ২
একে সময়তে অক্ষয় কুমাৰৰ OMG ২ য়েও লাভ কৰিছে অনুৰাগীৰ মৰম। লাহে লাহে OMG ২ য়ে বিশ্বজুৰি ১০০ কোটিৰ সীমা অতিক্ৰম কৰিছে । মুক্তিৰ ৭ তাৰিখে ছবিখনে ৫.২৫ কোটি টকা উপাৰ্জন কৰে । কিন্তু প্ৰথম উইকেণ্ড আৰু স্বাধীনতা দিৱসত ছবিখনে এদিনতে ১৭ কোটি টকা পৰ্যন্ত উপাৰ্জন কৰে। ভাৰতত OMG ২ য়ে এইপৰ্যন্ত ৮৪.৭২ কোটি টকা উপাৰ্জন কৰিছে ।
লগতে পঢ়ক: Gadar 2 Box Office Collection: ২০২৩ চনৰ দ্বিতীয়খন সৰ্বাধিক হিট ছবি হিচাপে পৰিগণিত গদৰ ২
