চিটাৰা ডেস্ক, 7 অক্টোবৰ : বলীউড ডিভা কৰীণা কাপুৰ খানে বৃহস্পতিবাৰে জনাই যে তেওঁ লণ্ডনত পৰিচালক হংসল মেহতাৰ সৈতে তেওঁৰ আহিবলগীয়া চলচ্চিত্ৰখনৰ দৃশ্যগ্ৰহণ আৰম্ভ কৰিছে । খবৰ অনুসৰি এই ফিচাৰ প্ৰকল্পটোত কৰীণাক এগৰাকী চোৰাংচোৱাৰ চৰিত্ৰত দেখিবলৈ পোৱা যাব । নতুন প্ৰজেক্টটো একতা কাপুৰে বালাজী মোচন পিকচাৰ্ছৰ জৰিয়তে সহ-প্ৰযোজনা কৰিছে ।
হংসল মেহতাৰ পৰিচালনাত কৰীণা কাপুৰেও প্ৰযোজক হিচাপে আত্মপ্ৰকাশ কৰিবলৈ আগবাঢ়িছে । বৃহস্পতিবাৰে কৰীণাই ইনষ্টাগ্ৰাম ষ্ট’ৰীত প্ৰডাকচনৰ কামত খোজ পেলোৱাৰ সময়ত নিজৰ উত্তেজনা অনুৰাগীৰ সৈতে শ্বেয়াৰ কৰে । কৰীণাই এখন ফটো শ্বেয়াৰ কৰিছে য’ত তেওঁক প্ৰযোজক হিচাপে তেওঁৰ নাম লিখা এখন ক্লেপব’ৰ্ড হাতত লৈ থকা দেখা গৈছে ।
"ক্লেপব’ৰ্ডত মোৰ নাম দেখি ইমান উত্তেজিত অনুভৱ কৰিছো...yayyyyy," হাৰ্ট ইম’জীৰে সৈতে এইদৰে লিখি এখন ফটো আপলোড কৰে কৰীণাই ৷ 42 বছৰীয়া অভিনেত্ৰী গৰাকীয়ে ইনষ্টাগ্ৰামত ছবিখনৰ শ্বুটিঙৰ সবিশেষ শ্বেয়াৰ কৰে । কৰীণাই লিখে, "1ম দিন, ফিল্ম নম্বৰ 67 নে 68 ? Chalo guys let's do this," ৷
এতিয়াও শিৰোনাম ঠিক নোহোৱা ছবিখনৰ শ্বুটিং লণ্ডনত দুটা সূচীত হ’ব । কৰীণাই পৰিয়ালৰ সৈতে দীপাৱলী উদযাপন কৰিবলৈ দেশলৈ উভতি আহিব ৷ তাৰ পিছত পুনৰ দ্বিতীয়টো সূচীৰ বাবে উৰা মাৰিব লণ্ডনলৈ । যদিও আগন্তুক ছবিখনৰ বিষয়ে বিশেষ কথা প্ৰকাশ কৰা হোৱা নাই, তথাপিও হংসল মেহতাৰ দৰে এজন পৰিচালক আৰু কৰীণাৰ দৰে তাৰকাৰ সংমিশ্ৰণে অনুৰাগীসকলক উৎসুক কৰি তুলিছে ৷ সকলোৱে আগ্ৰহেৰে অপেক্ষা কৰি আছে ছবিখনৰ বাবে ৷
মেহতাৰ চলচ্চিত্ৰখনৰ উপৰিও চলচ্চিত্ৰ নিৰ্মাতা সুজয় ঘোষৰ চিনেমাত দেখিবলৈ পোৱা যাব কৰীণাক ৷ ছবিখন হত্যাকাণ্ডৰে ভৰপূৰ এখন থ্ৰিলাৰ ছবি ৷ কাহিনীভাগ বিখ্যাত জাপানীজ লেখক কেইগ’ হিগাশ্বিন’ৰ অপূৰ্ব সৃষ্টি ‘দ্য ডিভ’ছন অৱ চাছপেক্ট এক্স’ ৰ আধাৰত নিৰ্মাণ কৰা হ’ব (Kareena Kapoor new movies) ৷ 2005 চনত এই গ্ৰন্থখন সৰ্বাধিক বিক্ৰী হৈছিল ৷ সুজয় ঘোষৰ এই নতুন চিনেমাখনত কৰীণাৰ সৈতে অভিনেতা জয়দীপ অহ্লৱাত আৰু বিজয় বাৰ্মাকো দেখিবলৈ পোৱা যাব ৷ 2018 চনৰ হিট ছবি বীৰে ডি ৱেডিঙৰ পিছত কৰীণা চলচ্চিত্ৰ প্ৰযোজক ৰিয়া কাপুৰৰ সৈতেও সহযোগিতা কৰিবলৈ সাজু হৈছে ।
লগতে পঢ়ক : Sushmita Sen as transgender: ট্ৰেন্সজেণ্ডাৰ এক্টিভিষ্ট গৌৰী সাৱন্তৰ ভূমিকাত সুস্মিতা সেন
