চিটাৰা ডেস্ক, ৯ জানুৱাৰী: ইজৰাইল আৰু গাজাৰ যুদ্ধ আৰম্ভ হোৱা ৪ মাহতকৈ অধিক সময় পাৰ হৈ গ’ল যদিও এতিয়াও অব্যাহত আছে যুদ্ধ । অক্টোবৰ মাহত গাজাৰ আক্ৰমণৰ পিচৰে পৰা দুয়োখন দেশৰ মাজত যুদ্ধ চলি আছে । ইফালে ইজৰাইলৰ বহু অভিনেতাইও যুদ্ধক্ষেত্ৰত প্ৰৱেশ কৰি নিজৰ দেশক ৰক্ষা কৰি আছে । ইজৰাইলৰ সামৰিক বাহিনীত অন্তৰ্ভুক্ত এটা নাম হৈছে অভিনেতা ইদান আমেদী, যাৰ বিষয়ে এতিয়া এটা ডাঙৰ খবৰ আহিছে ।
যুদ্ধক্ষেত্ৰত বেয়াকৈ আহত হৈছে ইদান আমেদী
নেটফ্লিক্সৰ ছুপাৰহিট ৱেব ছিৰিজ ‘ফৌদা’ত দেখা পোৱা অভিনেতা ইদানে ইজৰাইল আৰু গাজাৰ যুদ্ধৰ সময়ত নিজৰ দেশৰ হৈ যুঁজ দিয়াৰ সিদ্ধান্ত লৈছিল । অৱশ্যে এতিয়া খবৰ আহিছে যে গাজাৰ বিৰুদ্ধে যুঁজ দিওঁতে অভিনেতাগৰাকী বেয়াকৈ আঘাতপ্ৰাপ্ত হৈছে । সংবাদ মাধ্যমৰ খবৰ অনুসৰি সোমবাৰে গাজা ষ্ট্ৰিপৰ খান ইউনিছত হামাছৰ সন্ত্ৰাসবাদীৰ বিৰুদ্ধে যুঁজি থকা অৱস্থাত ইদান আমেদী গুৰুতৰভাৱে আহত হয় । ইয়াৰ পিচত লগে লগে বিমানযোগে ইদানক চিকিৎসালয়লৈ লৈ যোৱা হয় ।
জৰুৰীকালীন অস্ত্ৰোপচাৰ
এই খবৰ সংবাদ মাধ্যমৰ সন্মুখত নিশ্চিত কৰিছে ইদানৰ পিতৃয়ে । সম্প্ৰতি ইদান চিকিৎসালয়ত চিকিৎসাধীন হৈ আছে । তেওঁৰ আঘাতৰ বিষয়ে তথ্য দি অভিনেতাজনৰ সম্পৰ্কীয় ভগ্নী আয়েলেটে ছ’চিয়েল মিডিয়াত ইদানৰ এখন ফটো শ্বেয়াৰ কৰিছে, লগতে অভিনেতাজনৰ আশু আৰোগ্য কামনা কৰিছে ।
জানিব পৰা মতে, সোমবাৰে সন্ধিয়া প্ৰায় ৪ বজাত ইদানক ৰমাত গানৰ শ্বেবা মেডিকেল চেণ্টাৰলৈ অনা হৈছিল, য’ত অভিনেতাগৰাকীৰ জৰুৰীকালীন অস্ত্ৰোপচাৰ কৰা হৈছিল, যিটো বহু সময়লৈকে চলিছিল ।
বহুবাৰ যুদ্ধৰ দৃশ্য শ্বেয়াৰ কৰিছিল অভিনেতাজনে
উল্লেখযোগ্য যে, ইদান আমেদী ইজৰাইলৰ এজন সুপৰিচিত অভিনেতা, যিয়ে ৱেব ছিৰিজ ‘ফৌদা’ৰ সফলতাৰ পিচত সমগ্ৰ বিশ্বতে বিশেষ স্বীকৃতি লাভ কৰিছে । ইজৰাইল-হামাছৰ যুদ্ধৰ মাজতে অভিনেতাজনে নিজেই যুদ্ধক্ষেত্ৰত প্ৰৱেশ কৰাৰ সিদ্ধান্ত লয় । ইয়াৰ পিচত অভিনেতাগৰাকীয়ে অহৰহ এই যুদ্ধৰ দৃশ্য ছ’চিয়েল মিডিয়াৰ জৰিয়তে শ্বেয়াৰ কৰি থকা পৰিলক্ষিত হৈছিল ।
লগতে পঢ়ক: যশৰ জন্মদিন উদযাপন কৰিবলৈ গৈ মৃত্যু অনুৰাগীৰ, ভুক্তভোগীৰ পৰিয়ালক সাক্ষাৎ অভিনেতাগৰাকীৰ
