তেজপুৰ, ১৪ জুনঃ বায়ুসেনাৰ ধ্বংসপ্ৰাপ্ত AN-32 বিমানৰ দুৰ্ঘটনাস্থলীৰ পৰা ককপিট ভইচ ৰেকৰ্ডাৰ আৰু ফ্লাইট ডাটা ৰেকৰ্ডাৰ উদ্ধাৰ কৰিবলৈ সক্ষম হৈছে বায়ুসেনাই ৷ ইয়াৰ উপৰিও বায়ুসেনাই অক্ষত অৱস্থাত উদ্ধাৰ কৰিবলৈ সক্ষম হৈছে বিমানখনৰ ব্লেকবক্স ৷
আনহাতে বায়ুসেনাৰ শ্বহীদসকলৰ মৃতদেহ বৰ্তমান সময়লৈকে এয়াৰলিফ্ট কৰিব পৰা নাই বায়ুসেনা কৰ্তৃপক্ষই ৷ এইক্ষেত্ৰত প্ৰতিকূল বতৰে ব্যাপক অসুবিধাৰ সৃষ্টি কৰিছে বুলি জনাইছে বায়ুসেনাৰ মুখপাত্ৰ উইং কামাণ্ডাৰ ৰত্নাকৰ সিঙে ৷
উল্লেখ্য যে, ককপিট ভইচ ৰেকৰ্ডাৰ হৈছে এক যন্ত্ৰ যিয়ে বিমানৰ ভিতৰত সকলো কথোপকথন ৰেকৰ্ড কৰি ৰাখে ৷ আনহাতে ককপিট ভইচ ৰেকৰ্ডাৰৰ দৰেই ফ্লাইট ডাটা ৰেকৰ্ডাৰো একেধৰণৰেই এক যন্ত্ৰ যিয়ে বিমানৰ উৰণ সম্পৰ্কীয় প্ৰায় 88বিধ তথ্য যেনে, সময়, উচ্চতা, বিমানৰ গতিবেগ আদি ৰেকৰ্ড কৰি ৰাখে ৷ কিছুমান ফ্লাইট ডাটা ৰেকৰ্ডাৰে বিমানৰ উৰণ সম্পৰ্কীয় প্ৰায় এহেজাৰবিধ তথ্য সংৰক্ষণ কৰিব পাৰি ৷
