নগাঁও,20 ছেপ্তেম্বৰঃ কলং নৈক পুনৰুজ্জীৱিত কৰিবৰ বাবে বিশেষ পদক্ষেপ গ্ৰহণ কৰিছে অসম চৰকাৰৰ জল সম্পদ বিভাগে ৷ 'কলং পুনৰুজ্জীৱিতকৰণ আঁচনি'ৰ জৰিয়তে ভাৰত চৰকাৰৰ দ্বাৰা অনুমোদিত দিল্লীস্থ 'ৱাটাৰ এণ্ড পাৱাৰ কনছালটেন্সী চাৰ্ভিছ' চমুকৈ WAPCOSৰ সৈতে এক বুজাবুজিত উপনীত হৈছে অসম চৰকাৰৰ জল সম্পদ বিভাগ ৷ উল্লেখ্য যে,1964 চনতে কলিয়াবৰৰ হাতীমূৰাত বান্ধ দিয়াৰ ফলত মৰা সুঁতিত পৰিণত হৈছিল কলং নৈ ৷ এই সুঁতি ব্ৰহ্মপুত্ৰ নদীৰ পৰা ওলাই নগাঁও জিলাৰ মাজেৰে বৈ গৈ পুনৰ ব্ৰহ্মপুত্ৰ নদীত পৰিছেগৈ ৷ বান্ধৰ ফলত ডাষ্টবিনলৈ পৰিণত হৈছিল এসময়ত মাছ-কাছৰে উভৈনদী এই কলং নৈ ৷ সেয়েহে মৃত কলঙক পুনৰ প্ৰৱাহিত কৰিবৰ বাবে স্থানীয় ৰাইজ তথা দল -সংগঠনে দাবী জনাই আহিছিল ৷
অসম চৰকাৰৰ জল সম্পদ মন্ত্ৰী কেশৱ মহন্তই 'কলং পুনৰুজ্জীৱিতকৰণ আঁচনি' ৰূপায়ণৰ বাবে WAPCOSৰ দ্বাৰস্থ হৈ এক বুজা-বুজিত উপনীত হৈছিল ৷ সেই সূত্ৰেই হাতীমূৰাত WAPCOS এ আৰম্ভ কৰে তৃতীয় পৰ্যায়ৰ জৰীপ ৷ WAPCOSৰ প্ৰতিনিধিবৰ্গই ব্ৰহ্মপুত্ৰৰ কাষৰীয়া হাতীমূৰা,কলঙৰ উৎপত্তি স্থল আৰিকাটিমুখ আদি পৰিদৰ্শন কৰি সন্তুষ্টি প্ৰকাশ কৰে ৷ জৰীপৰ সময়ছোৱাত এই প্ৰতিনিধিবৰ্গৰ লগত উপস্থিত থাকে অসমৰ জল সম্পদ বিভাগৰ বহুকেইজন উচ্চপদস্থ বিষয়া ৷ দুবছৰীয়া স্তব্ধতাৰ অন্তত কলঙে পুনৰ প্ৰাণ পাব বুলি আশা কৰিছে কলংপৰীয়াবাসীয়ে ৷
