ডিব্ৰুগড়, 29 জুনঃ ডিব্ৰুগড় জিলাৰ লেজাইত চেচাঁ নদীৰ ৰিং বান্ধৰ ওপৰেদি হোৰাহোৰে বাগৰিছে পানী । নৈ খনৰ বাঢ়নী পানীয়ে ইতিমধ্যে বুৰাই পেলাইছে বিস্তীৰ্ণ অঞ্চল ৷
উল্লেখ্য যে, ২২ কোটি টকা ব্যয় সাপেক্ষে চৰকাৰে নিৰ্মাণ কৰিছিল ১০ কিলোমিটাৰ দৈৰ্ঘৰ ৰিং বান্ধটো । নিৰ্মাণৰ কাম সম্পূৰ্ণ নহওঁতেই ৰিং বান্ধটোৰ প্ৰায় তিনি কিল'মিটাৰ পৰ্যন্ত বুৰ গৈছে ৷ ইতিমধ্যে ৰিং বান্ধৰ ওপৰেইদি ভয়াৱহ ভাবে পানী সোমাই বুৰাই পেলাইছে ইখনৰ পিছত সিখনকৈ গাঁও ৷ ইতিমধ্যে ভয়ংকৰ হৈ পৰিছে বান পৰিস্থিতি ৷ নৈ খনৰ বাঢ়নী পানীত ঘৰ-দুৱাৰ বুৰ যোৱাৰ লগতে নষ্ট হৈছে বহু সা-সম্পত্তি ৷ তাৰোপৰি বানত ক্ষতি সাধন হয় বহু পশু ধনৰ ৷ আনহাতে লেজাই-কলাখোৱা অঞ্চলৰ বহু পৰিয়ালৰ কৃষিভূমি বানে নষ্ট কৰাত কৃষক সকল এতিয়া সৰ্বস্বান্ত হ'ব লগীয়া পৰিস্থিতিৰ সৃষ্টি হৈছে ।
উল্লেখ্য যে, স্বয়ং অসমৰ মুখ্যমন্ত্ৰীয়ে ৰিংবান্ধটো নিৰ্মানৰ শুভাৰম্ভ কৰি অতিশীঘ্ৰে সম্পূৰ্ণ কৰাৰ নিৰ্দেশ দিয়া পিছতো বিভাগীয় কৰ্তৃপক্ষই নিৰ্মাণৰ কাম সম্পূৰ্ণ নকৰা বুলি অভিযোগ কৰে স্থানীয় ৰাইজে ৷ লগতে বান্ধটোৰ নিৰ্মাণৰ কামত ঠিকাদাৰে বহু হেমাহি কৰা বুলি স্থানীয় ৰাইজে অভিযোগ উৎত্থাপন কৰে । আনহাতে পুৰণি মথাউৰি কালভাৰ্টৰ ওপৰতেই কিছু মাটি পেলাই নিৰ্মাণৰ দায়িত্ব সামৰা বুলি ৰাইজে ক্ষোভ প্ৰকাশ কৰে । স্থানীয় ৰাইজৰ অভিযোগ অনুসৰি শাসকীয় দলৰ পালি নেতাই ৰিং বান্ধটো নিৰ্মাণত জড়িত হৈ বহু অনিয়ম সংঘটিত কৰিছে ৷ ফলস্বৰূপে মুখ্যমন্ত্ৰীয়ে শুভাৰম্ভ কৰি যোৱা ২২ কোটি টকীয়া আঁচনি এতিয়া ফুটুকাৰ ফেনত পৰিণত হ'ল বুলি মন্তব্য কৰে স্থানীয় ৰাইজে ৷
লগতে পঢ়ক- ভূমিস্খলনঃ পাহাৰীয়া লোকক জাননী জাৰি প্ৰশাসনৰ
