নিউজ ডেস্ক, ২০ মে' : আজি কৰ্ণাটকৰ কংগ্ৰেছ চৰকাৰে আনুষ্ঠানিকভাৱে শপত গ্ৰহণ কৰে (Karnataka oath ceremony) । মুখ্যমন্ত্ৰী হিচাবে সিদ্দাৰামাইয়া আৰু উপ-মুখ্যমন্ত্ৰী হিচাবে ডি কে শিৱকুমাৰে শপত গ্ৰহণ কৰে (Siddaramaiah oath ceremony) । আনহাতে, নৱনিৰ্বাচিত কৰ্ণাটক চৰকাৰৰ শপত গ্ৰহণ অনুষ্ঠানৰ পিচতে কংগ্ৰেছ নেতা ৰাহুল গান্ধীয়ে কয়, "নফৰট কো মিতায়া, মহব্বত জিতি ।" অৰ্থাৎ ঘৃণা ওফৰিল, ভালপোৱাৰ জয় হ'ল । ৰাহুল গান্ধীয়ে ভাৰতীয় জনতা পাৰ্টীৰ দ্বাৰা পৰিচালিত পাঁচ বছৰীয়া ঘৃণাৰ শাসনৰ অন্ত পেলাই কংগ্ৰেছ দলক বাছনি কৰাৰ বাবে ভোটাৰসকলক ধন্যবাদ জ্ঞাপন কৰে (Rahul Gandhi thanks Kannadigas) ।
উল্লেখ্য যে কৰ্ণাটকত কংগ্ৰেছৰ বিজয়ৰ পিচত এই নিৰ্বাচনত কংগ্ৰেছে কেনেদৰে জয়লাভ কৰিলে সেই বিষয়ে বহুতো কথা ওলাইছে । সংবাদ মাধ্যমত এই সন্দৰ্ভত বিভিন্ন বিশ্লেষণ কৰা হৈছে । "কিন্তু মই ক'ব বিচাৰোঁ যে কংগ্ৰেছ এই কাৰণেই জিকিছে, কাৰণ আমি দৰিদ্ৰ, দলিত আৰু আদিবাসীসকলৰ সৈতে পিছফালে থিয় দিছিলোঁ । আমি সত্যত আছিলোঁ আৰু দৰিদ্ৰ লোকসকল আমাৰ লগত আছিল । বিজেপিৰ ওচৰত ধন, আৰক্ষী আৰু সকলো আছিল । কিন্তু কৰ্ণাটকৰ জনসাধাৰণে কংগ্ৰেছক নিৰ্বাচিত কৰি তেওঁলোকৰ সকলো ক্ষমতা পৰাস্ত কৰে ।" কংগ্ৰেছ কেনেকৈ শাসনলৈ আহিল সেই বিষয়ে ব্যাখ্যা কৰি ৰাহুল গান্ধীয়ে এনেদৰে কয় ।
ৰাহুলে লগতে কয়, "আমি আপোনালোকক ৫টা প্ৰতিশ্ৰুতি দিছিলোঁ । মই কৈছিলোঁ যে আমি মিছা প্ৰতিশ্ৰুতি নিদিওঁ । আমি যি কওঁ সেয়া কৰোঁ । ১-২ ঘণ্টাৰ ভিতৰতে কৰ্ণাটক চৰকাৰৰ প্ৰথমখন কেবিনেট বৈঠক অনুষ্ঠিত হ'ব আৰু উক্ত বৈঠকত এই ৫টা প্ৰতিশ্ৰুতি বাস্তৱত পৰিণত হ'ব (Rahul Gandhi on 5 promises in Karnataka) ।"
নৱনিৰ্বাচিত কৰ্ণাটক চৰকাৰৰ প্ৰথম কেবিনেট বৈঠকত কংগ্ৰেছে কাৰ্যকৰী কৰাৰ নিশ্চয়তা দিয়া পাঁচটা প্ৰতিশ্ৰুতি হৈছে : প্ৰথম প্ৰতিশ্ৰুতি 'গৃহলক্ষ্মী'- এই আঁচনিত একোটা পৰিয়ালৰ প্ৰতিগৰাকী মহিলা মুৰব্বীক ২,০০০ টকাকৈ প্ৰদান কৰা হ'ব । দ্বিতীয়টো হৈছে 'গৃহজ্যোতি' । এই আঁচনিত প্ৰতিটো পৰিয়ালক 200 ইউনিটকৈ বিনামূলীয়া বিদ্যুৎ প্ৰদান কৰিব । আনহাতে, তৃতীয় প্ৰতিশ্ৰুতিত 'অন্ন ভাগ্য' আঁচনিৰ জৰিয়তে প্ৰতিমাহে বিপিএল পৰিয়ালৰ প্ৰতিজন সদস্যক ১০ কিলোগ্ৰাম চাউল বিতৰণ কৰিব ।
চতুৰ্থ প্ৰতিশ্ৰুতিটো হৈছে 'যুৱ নিধি' । এই আঁচনিত নিবনুৱা স্নাতকসকলক 3,000 টকাকৈ আৰু নিবনুৱা ডিপ্ল'মাধাৰীসকলক দুবছৰৰ বাবে 1,500 টকাকৈ (18-25 বছৰ বয়সৰ ভিতৰত) প্ৰদান কৰা হ'ব । পঞ্চমটো প্ৰতিশ্ৰুতি হৈছে 'শক্তি' । এই আঁচনিত সমগ্ৰ কৰ্ণাটকত মহিলাসকলৰ বাবে ৰাজ্যিক বাছত বিনামূলীয়া ভ্ৰমণৰ সুবিধা প্ৰদান কৰিব ।
