নেশ্যনেল ডেস্ক,১৮ এপ্ৰিল: দেশত কৰ'ণাই ভয়াৱহ ৰূপ ধাৰণ কৰিছে যদিও পশ্চিমবংগত অব্যাহত আছে নিৰ্বাচনী যুঁজ । ইতিমধ্যে ৫ টা পৰ্যায়ৰ নিৰ্বাচন সমাপ্ত হৈছে আৰু ৩ পৰ্যায়ৰ ভোটগ্ৰহণ এতিয়াও বাকী । প্ৰতিটো ৰাজনৈতিক দলে ঠায়ে ঠায়ে নিৰ্বাচনী সভা আয়োজন কৰা দেখা গৈছে ।
কিন্তু ক'ভিডৰ পুনৰুত্থানৰ প্ৰতি লক্ষ্য ৰাখি কংগ্ৰেছ নেতা ৰাহুল গান্ধীৰ এক আদৰণীয় পদক্ষেপ । ৰাইজৰ সুৰক্ষাৰ কথা চিন্তা কৰি নেতাগৰাকীয়ে বাতিল কৰিলে তেওঁৰ নিৰ্বাচনী সভা । আগন্তুক দিনত তেওঁৰ সকলো ৰাজনৈতিক সভা বাতিল কৰাৰ লগতে বাকী দলবোৰকো মহামাৰীৰ সময়ত ডাঙৰ সভা আয়োজন কৰাৰ পৰা বিৰত থাকিবলৈ আহ্বান জনাইছে ।
ইফালে মহামাৰীৰ ভয়ংকৰ সংক্ৰমণৰ প্ৰতি লক্ষ্য ৰাখি ৰাজ্যখনৰ বাকী তিনিটা পৰ্যায়ৰ ভোটগ্ৰহণ একেদিনাই আয়োজন কৰাৰ বাবেও এক দাবী উত্থাপন হৈ আছে ৰাজ্যখনত । ইয়াৰ মাজতে দেশত যোৱা ২৪ ঘণ্টাত ২ লাখ ৬১ হাজাৰ ৫০০ টা কৰ'ণাৰ নতুন ঘটনা পোহৰলৈ আহিছে । ইয়াৰোপৰি দেশত একেদিনাই ক'ভিডত আক্ৰান্ত হৈ মৃত্যু হৈছে ১০৫১ গৰাকী লোকৰ ।
লগতে পঢ়ক:কুম্ভমেলালৈ পৰিদৰ্শন কৰা লোকক চৈধ্যদিন কোৱাৰেন্টাইন থকাৰ নিৰ্দেশ দিল্লী চৰকাৰৰ
