নেশ্যনেল ডেস্ক , 5 নৱেম্বৰ : শুকুৰবাৰে পুৱা কেদাৰনাথ মন্দিৰ(Kedarnath Temple)ৰ দৰ্শনাৰ্থে উত্তৰাখণ্ড(Uttarakhand)ত উপস্থিত হয় দেশৰ প্ৰধানমন্ত্ৰী নৰেন্দ্ৰ মোডী ৷ প্ৰধানমন্ত্ৰী মোডীক আদৰণি জনায় উত্তৰাখণ্ডৰ ৰাজ্যপাল(Governor) লেফটেনেণ্ট(Leftinent) জেনেৰেল গুৰমিত সিং (অৱসৰপ্ৰাপ্ত) আৰু মুখ্যমন্ত্ৰী পুষ্কৰ সিং ধামীয়ে ৷
জানিব পৰা মতে, মন্দিৰ সেৱাৰ পিছতে প্ৰধানমন্ত্ৰী মোডীয়ে পুনৰ নিৰ্মিত আদি শংকৰাচাৰ্যৰ সমাধিৰো কৰিব উদ্বোধন ৷ লগতে মোডীয়ে চলি থকা নিৰ্মাণ কাৰ্যৰ পৰ্যালোচনা আৰু পৰিদৰ্শন কৰিব বুলিও জানিব পৰা গৈছে । উল্লেখ্য যে, 2013 চনত উত্তৰাখণ্ডৰ বানপানীত আদি শংকৰাচাৰ্যৰ সমাধি ধ্বংস হোৱাৰ পিছত ইয়াক পুনৰ নিৰ্মাণৰ কাম আৰম্ভ কৰা হৈছে ।
সংবাদ মাধ্যমৰে হোৱা এক সাক্ষাৎকাৰত কেদাৰনাথ মন্দিৰৰ পুৰোহিত বাগিশ লিঙে কয়, ইতিমধ্যে প্ৰধানমন্ত্ৰী মোডীক আদৰণি জনাবলৈ মন্দিৰ চৌহদ ফুলেৰে সুন্দৰকৈ সজাই পৰাই তোলা হৈছে । এই কাৰ্যসূচীতে প্ৰধানমন্ত্ৰী গৰাকীয়ে পুৱা মন্দিৰত উপস্থিত হৈ মহাৰুদ্ৰ অভিষেকত ভাগ লৈ ৰাষ্ট্ৰৰ কল্যাণৰ অৰ্থে প্ৰাৰ্থনা কৰিব ৷ এইদৰে জনালে পুৰোহিত লিঙে ৷
ইয়াৰ পিছতে প্ৰধানমন্ত্ৰী মোডীয়ে 130 কোটি টকা ব্যয় সাপেক্ষে গ্ৰহণ কৰা বিশেষ আন্তঃগাঁথনি প্ৰকল্পটিৰ উদ্বোধন কৰাৰ লগতে আৰু বহুকেইটা প্ৰকল্পৰো আধাৰশিলা স্থাপন কৰিব ৷ ইয়াৰ ভিতৰত সৰস্বতী ৰিটেইনিং ৱাল আস্থাপথ আৰু ঘাট, মন্দাকিনী ৰিটেইনিং ৱাল আস্থাপথ, পুৰোহিত গৃহ আৰু মন্দাকিনী নদীৰ গৰুড় চাট্টি দলং উল্লেখযোগ্য ৷
উক্ত ভ্ৰমণকালত প্ৰধানমন্ত্ৰী মোডীয়ে এখন ৰাজহুৱা সভাতো সম্বোধন কৰিব বুলি জানিব পৰা গৈছে ৷
লগতে পঢ়ক : কি কি নতুন সিদ্ধান্ত ল’লে ৰাজ্যিক কেবিনেটে ?
