নিউজ ডেস্ক, 7 অক্টোবৰ : আইন সকলোৰে বাবে সমান ৷ আইন ভংগকাৰীসকলৰ বিৰুদ্ধে আৰক্ষীয়ে সদায়ে কঠোৰ ব্যৱস্থা গ্ৰহণ কৰি আহিছে ৷ এনে লোকক জৰিমণা বিহাৰ লগতে প্ৰয়োজনত কাৰাগাৰলৈও প্ৰেৰণ কৰা হয় ৷ কিন্তু ট্ৰেফিক আইন ভংগ কৰাৰ বাবে কুকুৰাক কাৰাগাৰলৈ প্ৰেৰণ !
ব্ৰিটেইনৰ ডুণ্ডিৰ ইষ্ট মাৰ্কেট গেটত 2016 চনত সংঘটিত হৈছিল এই ঘটনা ৷ অতি ব্যস্তময় এলেকাটোত কুকুৰাটোৱে ৰাস্তাত মাজত ঘূৰি-ফুৰি চালকসকলক অসুবিধাত পেলাইছিল ৷ কুকুৰাটোৰ কাৰণে পথত কেইবাটাও দুৰ্ঘটনা সংঘটিত হোৱাৰ পৰা কথমপিহে ৰক্ষা পৰে বহু বাহন ৷
অৱশেষত অতিষ্ঠ হৈ কেইবাজনো চালকে কুকুৰাটোৰ বিৰুদ্ধে আৰক্ষীক গোচৰ দিয়ে ৷ আৰক্ষীয়ে অভিযোগৰ ভিত্তিত কুকুৰাটোক আটক কৰি নিজৰ জিম্মাত লয় ৷ কুকুৰাটোক আটক কৰাৰ পাছতেই ৰাজপথ পুনৰ স্বাভাবিক অৱস্থালৈ ঘূৰি আহে ৷ ইফালে এই ঘটনাই লগে লগে শিৰোনাম দখল কৰে সংবাদ মাধ্যমৰ ।
আৰক্ষীয়েও সদৰি কৰিছিল কুকুৰাটো জিম্মাত লোৱাৰ কথা ৷ পুৱাৰ অতি ব্যস্ততাভৰা সময়খিনিতেই পথৰ মাজত চালকসকলৰ চিন্তাৰ কাৰণ হৈ পৰাৰ বাবে কুকুৰাটোক জিম্মাত লোৱা হৈছিল বুলি জানিবলৈ দিছিল আৰক্ষীয়ে ।
কিন্তু ইয়াৰ পাছত কি হ’ল কুকুৰাটোৰ লগত ! কুকুৰাটোক মুকলি কৰি দিয়া হ’ল নে কাৰাগাৰলৈ প্ৰেৰণ কৰা হয় ?
দৰাচলতে সংবাদ মাধ্যমত এই কথা প্ৰকাশ পোৱাৰ পাছতেই স্কটিছ ছ’চাইটি ফ’ৰ দা প্ৰিভেনচন অৱ ক্ৰুৱেলিটি টু এনিমেলছ নামৰ এটা পশুপ্ৰেমী সংগঠনে আৰক্ষীৰ সৈতে যোগাযোগ কৰি কুকুৰাটোৰ গৰাকী নোপোৱা পৰ্যন্ত দায়িত্ব লয় ৷
এই ঘটনা ইমানতেই অন্ত পৰা নাছিল ৷ কুকুৰাটোৱে কিয় অতি ব্যস্তময় সময়চোৱাত ৰাস্তাটো পাৰ হোৱাৰ চেষ্টা কৰিছিল তাক জানিবলৈ আৰক্ষীয়ে তদন্ত আৰম্ভ কৰে । ইফালে কুকুৰাটোৰ গৰাকীক বিচাৰি ফেচবুকত পোষ্টো কৰা হৈছিল । এক প্ৰায় সহস্ৰাধিক লোকে এই পোষ্টটো শ্বেয়াৰ কৰিছিল । এই পোষ্টত বহুজনে বহু মন্তব্যও কৰিছিল । অৱশ্যে, ইয়াৰ পৰা পৰা কুকুৰাটোৰ গৰাকীক বিচাৰি পোৱাটো সম্ভৱ হোৱা নাছিল ।
লগতে পঢ়ক : জনা-নজনা : বিমানৰ বাহিৰত সঁচাকৈ ওলমি যাব পাৰি নে ?
