নিউজ ডেস্ক,২১ ফেব্ৰুৱাৰী: আন্তৰ্জাতিক মাতৃভাষা দিৱস হৈছে ভাষা আৰু বহু ভাষাৰ অন্তৰ্ভুক্তিৰে বিভিন্ন দিশত উন্নয়ন সাধন কৰা । ইউনেস্ক’ৱে বিশ্বাস কৰে যে প্ৰথম ভাষা বা মাতৃভাষাৰ ওপৰত আধাৰিত শিক্ষা প্ৰাৰম্ভিক বছৰৰ পৰা আৰম্ভ হ'ব লাগে কিয়নো শৈশৱৰ যত্ন আৰু শিক্ষা হৈছে শিক্ষণৰ আধাৰ । আন্তৰ্জাতিক মাতৃভাষা দিৱসত ৰাষ্ট্ৰসংঘৰ অন্তৰ্গত ইউনেস্ক’ আৰু সংস্থাসমূহে ভাষাগত আৰু সাংস্কৃতিক বৈচিত্ৰতা প্ৰচাৰৰ বাবে বিশেষ অনুষ্ঠানৰ আয়োজন কৰে । সংস্থাসমূহে মানুহক এটাতকৈ অধিক ভাষা শিকি আৰু ব্যৱহাৰ কৰোঁতে তেওঁলোকৰ মাতৃভাষাৰ বিষয়ে জ্ঞান বজাই ৰাখিবলৈ উৎসাহিত কৰে । বিভিন্ন সময়ত চৰকাৰ আৰু বেচৰকাৰী সংগঠনে ভাষা শিক্ষণ আৰু সমৰ্থনক উৎসাহিত কৰিবলৈ বহু আঁচনি ঘোষণা কৰিবলৈ এই দিনটো উদযাপন কৰা দেখা যায় ।
বাংলাদেশত ২১ ফেব্ৰুৱাৰী দিনটো হৈছে দেশৰ ইতিহাসৰ এটা গুৰুত্বপূৰ্ণ দিন । এই দিনটোত দেশবাসীয়ে শ্বহীদসকলৰ স্মৃতিস্তম্ভত শ্ৰদ্ধাঞ্জলি জনায় । দেশখনৰ নাগৰিকে মহিলাসকলৰ বাবে কাচৰ খাৰু ক্ৰয় কৰে, বিভিন্ন কাৰ্যসূচী ৰূপায়ণ কৰে আৰু সকলোৱে মিলি ভোজ ভাত খায় । লগতে বাংলাদেশৰ সংস্কৃতি আৰু বাংলা ভাষাকলৈ বিশেষ কাৰ্যসূচী ৰূপায়ণ কৰে।
স্পেইনৰ বাৰ্চিলোনাস্থিত লিঙ্গুৱাপেক্স ইনষ্টিটিউটৰ লক্ষ্য হৈছে বিশ্বব্যাপী ভাষা বৈচিত্ৰতাক সংৰক্ষণ আৰু প্ৰচাৰ কৰা । প্ৰতিষ্ঠানটোৱে প্ৰতি বছৰে আন্তৰ্জাতিক মাতৃভাষা দিৱসত লিঙ্গুৱাপেক্স পুৰস্কাৰ প্ৰদান কৰে । এই পুৰস্কাৰটো সেইসকলক প্ৰদান কৰা হয় যিয়ে ভাষাগত বৈচিত্ৰতা বা বহু ভাষাৰ শিক্ষাৰ লগতে বিকাশত অৰিহণা যোগায় ।
২০২১ বৰ্ষৰ আন্তৰ্জাতিক মাতৃভাষা দিৱসৰ বিষয়বস্তু
২০২১ চনৰ আন্তৰ্জাতিক মাতৃভাষা দিৱসৰ বিষয়বস্তু হৈছে শিক্ষা আৰু সমাজ জীৱনত বিভিন্ন ভাষা অন্তৰ্ভূক্ত কৰি মাতৃভাষা আৰু বিভিন্ন ভাষাৰ বিকাশ সাধন কৰা আৰু ইয়াৰ জৰিয়তে বহনক্ষম উন্নয়নৰ ওপৰত গুৰুত্ব দিয়া হৈছে । এই বছৰ বিশেষকৈ আইন প্ৰণেতা,শিক্ষাবিদ আৰু শিক্ষক, অভিভাৱক আৰু পৰিয়ালক বিভিন্ন ভাষাৰ শিক্ষাৰ প্ৰতি আগ্ৰহ বৃদ্ধি কৰিবলৈ আহ্বান জনোৱা হৈছে । লগতে ক'ভিড-19 সৃষ্ট পৰিৱেশৰ বাবে প্ৰভাৱ পৰা শিক্ষা ব্যৱস্থাক পুনৰুদ্ধাৰ কৰি আগুৱাই নিবলৈও আহ্বান জনোৱা হৈছে ।
ইতিহাস
এই দিনটোৰ আৰম্ভণি হৈছিল ১৯৫২ চনৰ পৰা যেতিয়া ঢাকা বিশ্ববিদ্যালয়ৰ শিক্ষাৰ্থী সকলে তেওঁলোকৰ মাতৃভাষা বাংলাক ৰাজ্যিক ভাষা হিচাপে প্ৰতিষ্ঠা কৰিবলৈ বিভিন্ন প্ৰতিবাদ আৰু সমদল উলিয়াইছিল । ভাৰত আৰু পাকিস্তান বিভাজনৰ পিছত পাকিস্তান চৰকাৰে উৰ্দুক পূৱ পাকিস্তান আৰু পশ্চিম পাকিস্তানৰ বাবে ৰাজ্যিক ভাষা হিচাপে ঘোষণা কৰিছিল ।
পূৱ পাকিস্তানৰ লোকসকলে অৰ্থাৎ বৰ্তমানৰ বাংলাদেশৰ লোকসকলে মাতৃভাষাৰ বাবে যুঁজ দিছিল আৰু এই সংগ্ৰামত বহুতে জীৱন ত্যাগ কৰিছিল । অৱশেষত ১৯৫৬ চনত চৰকাৰে বাংলা বা বঙালীক চৰকাৰী মৰ্যদা প্ৰদান কৰে । পৰৱৰ্তী ১৯৭১ চনত বাংলাদেশ স্বতন্ত্ৰ হিচাপে নিজকে প্ৰতিষ্ঠা কৰিবলৈ সক্ষম হয় । যাৰ বাবে দেশখনে এতিয়াও ২১ ফেব্ৰুৱাৰীত ৰাষ্ট্ৰীয় বন্ধ পালন কৰে আৰু আন্তৰ্জাতিক মাতৃভাষা দিৱস উদযাপন কৰে ।
