নেশ্যনেল ডেস্ক, ২৯ মে': দিল্লীত যোৱা ২৪ ঘণ্টাত প্ৰায় ৯০০ জন লোক ক'ভিড-১৯ত আক্ৰান্ত হৈছে । দিল্লীৰ মুখ্যমন্ত্ৰী অৰবিন্দ কেজৰিৱালে শনিবাৰে কয় যে, শুকুৰবাৰে ৰাজধানী চহৰখনত আক্ৰান্ত হোৱা লোকৰ সংখ্যা যোৱা মাৰ্চ মাহৰ পিছত প্ৰথমবাৰৰ বাবে হ্ৰাস পাইছে । যোৱা ২৩ মাৰ্চত দিল্লীত ১,১০০ জন লোক কৰ'ণাত আক্ৰান্ত হৈছিল ।
শনিবাৰে কেজৰিৱালে এক সংবাদমেল সম্বোধন কৰি কয় যে, যোৱা ২৪ ঘণ্টাত ৯০০ জন লোকৰ দেহত কৰ'ণা ভাইৰাছৰ উপস্থিতি ধৰা পৰিছে । শুকুৰবাৰে দিল্লী চৰকাৰে ক্ৰমান্বয়ে আনলক প্ৰক্ৰিয়া আৰম্ভ কৰাৰ কথা ঘোষণা কৰাৰ পিছতে আক্ৰান্তৰ হাৰ হ্ৰাস পোৱাৰ কথা জানিব পৰা গৈছে । মহামাৰীৰ ভয়াৱহ সংক্ৰমণৰ পৰিপ্ৰেক্ষিতত যোৱা ১৯ এপ্ৰিলৰ পৰা কঠোৰ লকডাউনৰ জাৰি কৰা হৈছিল দিল্লীত ।
শুকুৰবাৰে দিল্লীত দৈনিক আক্ৰান্তৰ হাৰ ২ শতাংশতকৈ কম আছিল । ৰাজধানী চহৰখনত সক্ৰিয় ৰোগীৰ সংখ্যা ১৫ হাজাৰতকৈ হ্ৰাস পাইছে । লগতে হোম আইচ’লেশ্যনত থকা ক'ভিড ৰোগীৰ সংখ্যা ৭,০০০ জনতকৈ হ্ৰাস পাইছে । দিল্লীত যোৱা ২০ এপ্ৰিলত ২৮, হাজাৰৰো অধিক লোক আক্ৰান্ত হৈছিল । আনহাতে ২২ এপ্ৰিলত সৰ্বাধিক দৈনিক আক্ৰান্তৰ হাৰ আছিল 36 শতাংশতকৈ অধিক ।
