Meghalaya polls result: চৰকাৰ গঠনৰ বাবে সহায় বিচাৰি অমিত শ্বাহলৈ চাংমাৰ ফোন !
ওলোমা চৰকাৰ গঠনৰ দিশে মেঘালয় বিধানসভা ৷ কোনো এটা দলেই লাভ নকৰিলে সংখ্যা গৰিষ্ঠতা ৷ চৰকাৰ গঠন কৰিবলৈ শাসকীয় এনপিপি দলক প্ৰয়োজন অতিৰিক্ত 5 খন আসনৰ ৷ সহায় বিচাৰি অমিত শ্বাহলৈ ফোন কনৰাড চাংমাৰ ৷ হিমন্ত বিশ্ব শৰ্মাৰ টুইট (CM Sangma calls Amit Shah) ৷
সহায় বিচাৰি শ্বাহলৈ চাংমাৰ ফোন
নিউজডেস্ক, 2 মাৰ্চ: মেঘালয় বিধানসভা নিৰ্বাচনৰ ভোটগণনা প্ৰায় সমাপ্ত হৈছে ৷ যোৱা 27 ফেব্ৰুৱাৰীত মেঘালয়ৰ 59 টা সমষ্টিত নিৰ্বাচন অনুষ্ঠিত হৈছিল ৷ ছ’হিয়ং সমষ্টিৰ ইউডিপি প্ৰাৰ্থী তথা প্ৰাক্তন গৃহমন্ত্ৰী এইছ ডি আৰ লিংডোৰ আকস্মিক মৃত্যুৰ পৰিপ্ৰেক্ষিতত সমষ্টিটোত নিৰ্বাচন স্থগিত ৰখা হয় ৷ বৰ্তমানলৈকে ঘোষিত ফলাফল অনুসৰি মেঘালয়ত শাসনাধিষ্ঠিত এনপিপি দলে 24 খন আসনত জয়লাভ কৰিছে আৰু দুখন আসনত অগ্ৰগতি লৈ আছে (Meghalaya assembly election result update) ৷
এই নিৰ্বাচনত বিজেপিয়ে লাভ কৰিছে দুখন আসন ৷ ইউনাইটেড ডেমক্ৰেটিক পাৰ্টীয়ে লাভ কৰিছে 11 খন আসন ৷ ইয়াৰ বিপৰীতে তৃণমূল কংগ্ৰেছে 5 খন, বিজেপি, এইছ এছ পি ডি পি, নিৰ্দলীয়, পিডিএফে দুখনকৈ আসনত জয়লাভ কৰিছে ৷ ভাৰতীয় জাতীয় কংগ্ৰেছে 5 খন আৰু ভিপিপিয়ে 4 খন আসনত জয়লাভ কৰিছে (Meghalaya election result 2023) ৷
নিৰ্বাচনী ফলাফল ঘোষণাৰ মাজতে চৰ্চালৈ অহা বিষয়টো হৈছে, যিহেতু কোনো এটা দলেই মেঘালয়ত সংখ্যাগৰিষ্ঠতা লাভ নকৰিলে, এই ক্ষেত্ৰত মিত্ৰতা কাৰ কাৰ মাজত হ’ব ? অসমৰ মুখ্যমন্ত্ৰী তথা নেডাৰ আহ্বায়ক হিমন্ত বিশ্ব শৰ্মাই মন্তব্য কৰিছে যে, কনৰাড চাংমাই ইতিমধ্যে মিত্ৰতা বিচাৰি কেন্দ্ৰীয় গৃহমন্ত্ৰী অমিত শ্বাহৰ সৈতে যোগাযোগ কৰিছে ৷ ‘‘মেঘালয়ৰ মুখ্যমন্ত্ৰী কনৰাড চাংমাই কেন্দ্ৰীয় গৃহমন্ত্ৰী অমিত শ্বাহজীক ফোন কৰিছে আৰু নতুন চৰকাৰ গঠনৰ বাবে সহায় আৰু আশীৰ্বাদ বিচাৰিছে ৷’’ টুইটযোগে এই কথা কয় ড৹ শৰ্মাই (CM Sangma calls Amit Shah) ৷
তেওঁ লগতে কয় যে, বিজেপিৰ ৰাষ্ট্ৰীয় সভাপতি জেপি নাড্ডাই মেঘালয়ৰ বিজেপি দলক এনপিপিক পৰৱৰ্তী চৰকাৰ গঠনৰ বাবে সহায় কৰিবলৈ আহ্বান জনাইছে ৷ নিজৰ টুইটত হিমন্ত বিশ্ব শৰ্মাই কয় ‘‘আদৰণীয় বিজেপিৰ ৰাষ্ট্ৰীয় সভাপতি জেপি নাড্ডা জীয়ে মেঘালয় ৰাজ্যিক বিজেপিক এনপিপি দলক চৰকাৰ গঠনত সহায় কৰিবলৈ উপদেশ দিছে ৷’’ (JP Nadda on Meghalaya election result)
লগতে পঢ়ক: Big defeat of CPIM in Tripura: টিপ্ৰা মঠাৰ গাত চিপিআইএমৰ পৰাজয়ৰ দোষ জাপিলে হান্নান মোল্লাহে
ইয়াৰ পূৰ্বে কনৰাড চাংমাই সাংবাদিকৰ আগত মিত্ৰতাৰ প্ৰসংগত চৰ্চিত হোৱা খবৰ সন্দৰ্ভত নস্যাৎ কৰিছিল ৷ নিৰ্বাচনী ফলাফল সম্পূৰ্ণ হোৱাৰ পিচতহে মিত্ৰতাৰ বিষয়ে আলোচনা হ’ব বুলি তেওঁ সদৰী কৰে ৷ তেওঁ কয়, ‘‘আমি মেঘালয়ৰ ৰাইজক আমাক ভোটদান কৰাৰ বাবে ধন্যবাদ জনাইছোঁ ৷ চৰকাৰ গঠনৰ বাবে আমাৰ কেইখনমান আসন কমি আছে ৷ গতিকে ভোট গণনা সম্পূৰ্ণ হোৱাৰ পাচত আমি পৰৱৰ্তী পদক্ষেপ সন্দৰ্ভ সিদ্ধান্ত গ্ৰহণ কৰিম ৷’’ মেঘালয়ৰ মুখ্যমন্ত্ৰী কনৰাড চাংমাই দক্ষিণ তুৰা সমষ্টিৰ পৰা জয়লাভ কৰিছে ৷ তেওঁ লাভ কৰে 10,090 টা ভোট ৷
