নিউজ ডেস্ক, 16 আগষ্ট: উত্তৰ প্ৰদেশৰ কানপুৰত এগৰাকী কিশোৰীৰ এটি ভিডিঅ’ ছ’চিয়েল মিডিয়াত ভাইৰেল হোৱাৰ পাচত সৃষ্টি হৈছে তীব্ৰ চাঞ্চল্যৰ ৷ ভিডিঅ’ত অভিযোগ উত্থাপন কৰা অনুসৰি, গোবিন্দ নগৰ আৰক্ষী থানাৰ এজন আৰক্ষী বিষয়াই কিশোৰী গৰাকীক ভাড়াঘৰৰ মালিকৰ ভতিজাকৰ বিৰুদ্ধে এজাহাৰ দাখিল কৰাৰ বাবে নৃত্য কৰিবলৈ আদেশ দিয়ে ৷
16 বছৰীয়া কিশোৰী গৰাকীয়ে ভিডিঅ’যোগে অভিযোগ উত্থাপন কৰে যে, আৰক্ষী বিষয়াজনে তেওঁক আৰক্ষী থানাত মাতি নি নৃত্য কৰিবলৈ নিৰ্দেশ দিছিল ৷ উল্লেখ্য যে, কিশোৰী গৰাকী গোবিন্দ নগৰৰ ডাবাউলীৰ পশ্চিম প্ৰান্তত ভাড়াঘৰত বাস কৰে ৷
প্ৰাপ্ত তথ্য অনুসৰি, কিশোৰী গৰাকীৰ পৰিয়াল ‘জাগৰণ’ পাৰ্টীৰ সৈতে জড়িত ৷ পৰিয়ালে জনোৱা মতে, ভাড়াঘৰৰ মালিকৰ ভতিজাকৰ বিৰুদ্ধে এজাহাৰ দাখিল কৰিবলৈ চেষ্টা কৰা হৈছিল ৷ কিয়নো মালিকৰ ভতিজাকে কিশোৰী গৰাকীক বেয়া ব্যৱহাৰ কৰাৰ উপৰিও কিছুদিন পূৰ্বে কিশোৰী গৰাকীৰ পৰিয়ালক ভাড়াঘৰৰ পৰা উলিয়াই দিবলৈ চেষ্টা কৰিছিল ৷
আনহাতে, কিশোৰী গৰাকীৰ মাতৃয়ে সাংবাদিকক জানিবলৈ দিয়ে যে, মালিকৰ ভতিজাক আৰ্থাৎ অভিযুক্ত অনুপ যাদৱে 26 জুলাইত তেওঁলোকৰ ঘৰৰ ভিতৰত প্ৰৱেশ কৰে আৰু তেওঁলোকৰ ওপৰত আক্ৰমণ কৰে ৷ ইয়াৰ পাচত পুনৰ 7 আগষ্টত কিশোৰী গৰাকীয়ে বজাৰৰ পৰা ঘৰ অভিমুখে আহি থকাৰ সময়ত তেওঁক বেয়া ব্যৱহাৰ কৰে ৷ কিশোৰী গৰাকীয়ে গোবিন্দ নগৰৰ আৰক্ষী বিষয়া অনুৰাগ মিশ্ৰাক এই কথা অৱগত কৰাৰ পাচত আৰক্ষী বিষয়াজনে কিশোৰী গৰাকীক নৃত্য কৰিবলৈ নিৰ্দেশ দিয়ে ৷
গোবিন্দ নগৰৰ চক্ৰ বিষয়া বিকাশ কুমাৰ পাণ্ডেই সদৰি কৰে যে, ভাড়াঘৰ দখল সন্দৰ্ভত প্ৰথম অৱস্থাৰ পৰাই দুয়োপক্ষৰ মাজত বিবাদ চলি আছিল ৷ ইয়াৰোপৰি তেওঁ কয় যে, এই অভিযোগৰ কোনো তাৎপৰ্য নাই ৷ আৰক্ষীৰ ওপৰত হেঁচা প্ৰয়োগ কৰিবলৈ কিশোৰী গৰাকীয়ে ভিডিঅ’টি ভাইৰেল কৰিছিল ৷ অৱশ্যে এই সন্দৰ্ভত তদন্ত অব্যাহত ৰখা হৈছে ৷
লগতে পঢ়ক: উত্তৰাখণ্ডৰ বিজেপি বিধায়কৰ ওপৰত যৌন শোষণৰ অভিযোগ মহিলাৰ
