পাকিস্তানত সন্ধানহীন কাৰ্টাৰপুৰ চাহিবলৈ যোৱা ভাৰতীয় যুৱতী

তিনিদিন পূৰ্বে পাকিস্তানস্থিত কাৰ্টাৰপুৰ চাহিব গুৰুদ্বাৰা দৰ্শন কৰিবলৈ যোৱা এগৰাকী ভাৰতীয় যুৱতী সন্ধানহীন হয় ৷ ঘটনা সন্দৰ্ভত পাকিস্তান আৰক্ষীয়ে ইতিমধ্যে চাৰিজনকৈ লোকক আটক কৰিছে ৷

নেশ্বনেল ডেস্ক, 2 ডিচেম্বৰঃ অক্টোবৰ মাহত ভাৰত-চৰকাৰ আৰু পাকিস্তান চৰকাৰৰ সহমতত মুকলি হোৱা কাৰ্টাৰপুৰ চাহিব কৰিডৰত সন্ধানহীন হৈছে এগৰাকী ভাৰতীয় যুৱতী ৷ পাকিস্তানস্থিত কাৰ্টাৰপুৰ চাহিব গুৰুদ্বাৰা দৰ্শনৰ বাবে যোৱা এগৰাকী শিখ যুৱতী বিগত তিনিদিন ধৰি সন্ধানহীন হৈ আছে ৷ ভাৰত চৰকাৰ আৰু পাকিস্তান চৰকাৰৰ বৈদেশিক বিভাগে ঘটনাটো গুৰুত্বপূৰ্ণ হিচাপে লৈ ইয়াৰ অনুসন্ধান ইতিমধ্যে আৰম্ভ কৰিছে ৷ পাকিস্তানৰ লাহোৰ আৰু ফৈচালাবাদৰ পৰা আৰক্ষীয়ে ঘটনাৰ লগত জড়িত থকাৰ অভিযোগত চাৰিগৰাকীকৈ লোকক আটক কৰিছে ৷ অৱশ্যে এতিয়াও যুৱতীগৰাকীৰ সন্ধান উলিওৱাত ব্যৰ্থ হৈ আছে পাকিস্তান আৰক্ষী ৷

লগতে পঢ়কঃ ভাৰতীয় নৌ-সেনাৰ প্ৰথমগৰাকী মহিলা বৈমানিক ছাব লেফ. শিৱাংগী সিং

ঘটনাৰ বাবে এতিয়াও দুয়োখন দেশৰ বৈদেশিক বিভাগে কোনো চৰকাৰী ঘোষণা প্ৰকাশ কৰা নাই ৷ বিশেষ সূত্ৰৰ পৰা লাভ কৰা খবৰ অনুসৰি, গুৰুনানকৰ 550 বছৰীয়া জন্মজয়ন্তী উপলক্ষে কাৰ্টাৰপুৰ চাহিব গুৰুদ্বাৰা দৰ্শনৰ বাবে গৈছিল পঞ্জাৱৰ শিখ যুৱতীগৰাকী ৷ কাৰ্টাৰপুৰ চাহিব গুৰুদ্বাৰাত উপস্থিত হোৱাৰ পিচতেই ৰহস্যজনকভাৱে সন্ধানহীন হৈ পৰে যুৱতীগৰাকী ৷