নেশ্যনেল ডেস্ক, 26 এপ্ৰিল : ৰাষ্ট্ৰীয় স্বয়ংসেৱক সংঘৰ (RSS) মুৰব্বী মোহন ভগৱতে দেওবাৰে দেশৰ জনতালৈ এক আহ্বান জনাইছে ৷ কৰ'ণা ভাইৰাছৰ ফলত বৰ্তমানলৈকে ভাৰতত প্ৰায় 800 ৰো অধিক লোকে প্ৰাণ হেৰুওৱাৰ ফলত সকলোকে ইয়াক প্ৰতিহত কৰিবৰ বাবে স্বদেশী ভাৱধাৰা গ্ৰহণ কৰিবলৈ আহ্বান জনায় ৷
অনলাইনযোগে আগবঢ়োৱা এক ভাষণত তেওঁ লগতে কয় যে, কৰ'ণা ভাইৰাছ প্ৰতিহত কৰিবৰ বাবে জনসাধাৰণে ঘৰতে বাস কৰাৰ লগতে লকডাউনৰ নিৰ্দেশনা আৰু সামাজিক দূৰত্ব মানি চলাটো অতি গুৰুত্বপূৰ্ণ ৷ ভগৱতে কয়, "ঘৰতে থাকক আৰু ভগৱানক প্ৰাৰ্থনা কৰক ৷"
তেওঁ কয়, "দেশত কৰ'ণা ভাইৰাছৰ ফলত সংকট বৃদ্ধি পাইছে ৷ ঘৰতে বাস কৰিলেহে সকলোৱে এই যুদ্ধ জয় কৰিবলৈ সক্ষম হ'ব ৷ লগতে আমি লকডাউনৰ নিৰ্দেশাৱলী আৰু সামাজিক দূৰত্ব মানি চলিব লাগিব ৷"
স্ব-নিৰ্ভৰশীল হ'বলৈ সকলোকে আহ্বান জনাই তেওঁ কয়, "আমি লকডাউন মানি চলিব লাগিব ৷ এই সংকটৰ পৰা আমি মুক্ত হ'ব লাগিব ৷ এই সংকটৰ পৰা আমি সুবিধা উলিয়াব লাগিব ৷ স্বদেশী ভাৱধাৰা গ্ৰহণ কৰিব লাগিব ৷"
ভগৱতে লগতে কয়, "এই সমাজখন আমাৰ...দেশখন আমাৰ, সেয়েহে আমি কাম কৰি আছো ৷ এয়া এক নতুন ৰোগ, সেয়েহে এই বিষয়ে কাৰোৰে বেছি জ্ঞান নাই ৷ সেয়েহে সাৱধানেৰে কাম কৰক ৷ ভাগৰি নপৰিব, চেষ্টা অব্যাহত ৰাখিব লাগিব ৷ অনুগ্ৰহ কৰি চৰকাৰৰ নিৰ্দেশাৱলী অনুসৰণ কৰক ৷"
"আমি কাৰো মাজত বিভেদ নানো ৷ আমাৰ চেষ্টা হৈছে সকলোকে সহায় আগবঢ়োৱা ৷ আমি স্বদেশী ভাৱধাৰা গ্ৰহণ কৰিব লাগিব ৷ সমাজৰ লগতে দেশে স্বদেশী ভাৱধাৰা গ্ৰহণ কৰিলে বিদেশী সামগ্ৰীৰ ওপৰত ভৰষা কৰিব লগা নহ'ব ৷"
RSS ৰ মুৰব্বী গৰাকীয়ে লগতে কয় যে, 10 জুন পৰ্যন্ত সংঘৰ সকলো অনুষ্ঠান স্থগিত ৰখা হৈছে ৷
