নিউজ ডেস্ক, ১৮ জানুৱাৰী: সমগ্ৰ দেশতে অব্যাহত আছে ড্ৰাগছৰ অবাধ বেহা । মায়ানগৰী মুম্বাইতো অব্যাহত নিষিদ্ধ ড্ৰাগছৰ বেহা । এইবাৰ ড্ৰাগছ সম্বন্ধীয় ঘটনাত মহাৰাষ্ট্ৰৰ মন্ত্ৰী নৱাব মালিকৰ জোঁৱাইৰ নাম সাঙোৰ খাইছে । সোমবাৰে নৱাব মালিকৰ জোঁৱাই সমীৰ খানে আদালতত হাজিৰ হোৱাৰ পূৰ্বে স্বাস্থ্য পৰীক্ষাৰ বাবে চিকিৎসায়লৈ প্ৰেৰণ কৰা হয় । ১৩ জানুৱাৰীত ড্ৰাগছ সম্বন্ধীয় ঘটনাত সমীৰ খানক নাৰ্ক'টিকছ কন্ট্ৰোল ব্যুৰ' চমুকৈ এন চি বিয়ে গ্ৰেপ্তাৰ কৰিছিল । সোমবাৰে সমীৰৰ জিম্মাৰ অন্ত পৰাৰ কথা আছিল ।
ঘটনা সন্দৰ্ভত নৱাব মালিকে ১৪ জানুৱাৰীত দেশৰ ন্যায়পালিকাক সন্মান জনাই টুইট কৰি কৈছিল যে আইনৰ উৰ্ধত কোনো নহয় আৰু ভেদভাৱ অবিহনে ইয়াৰ বিচাৰ কৰিব লাগে । আইনে নিজে তাৰ সিদ্ধান্ত গ্ৰহণ কৰি ন্যায় প্ৰদান কৰিব ।
এন চি বিৰ অধিবক্তাই ১৪ জানুৱাৰীত জানিবলৈ দিয়া মতে, সমীৰৰ চি বি ডি অইল আৰু অন্য ৰাসায়নিক পদাৰ্থ আদিৰে ড্ৰাগছ সম্বন্ধীয় ঘটনাৰে জড়িত মেছেজ প্ৰমাণ হিচাপে লাভ কৰিছিল এন চি বিয়ে । নিচাজাতীয় ঔষধ বিক্ৰীৰেও জৰিত থকাৰ উপৰিও সমীৰ আৰু তেওঁৰ বন্ধু কৰণৰ ২০,০০০ তকৈও অধিক টকাৰ লেনদেন ঘটিছিল । যাৰ ফলস্বৰূপে এন ডি পি এচ আইনৰ ২৭ এ ৰ অধীনত গ্ৰেপ্তাৰ কৰা হয় ।
