নেশ্যনেল ডেস্ক, ২১ অক্টোবৰ: ৰাজস্থানৰ জয়পুৰৰ পঞ্চমুখী হনুমান মন্দিৰৰ পাহাৰত মঙলবাৰে নিশা বিধ্বংসী অগ্নিকাণ্ড সংঘটিত হয়। নিমিষতে জুইৰ লেলিহান শিখাই আশে-পাশে থকা ৫ কি:মি: পৰ্যন্ত অঞ্চল আগুৰি ধৰে। জুই দেখাৰ পিছতে স্থানীয় লোকে অগ্নি নিৰ্বাপক বাহিনীক খবৰ দিয়ে আৰু নিজাববীয়াকৈও জুই নুমুওৱাৰ চেষ্টা কৰে। খবৰ পোৱাৰ পিছতে অগ্নি নিৰ্বাপক বাহিনী উপস্থিত হৈ জুই নিৰ্বাপিত কৰে।
অগ্নি নিৰ্বাপক বাহিনীৰ বিষয়াই ই টি ভি ভাৰতৰ সাংবাদিকৰ আগত প্ৰকাশ কৰে যে, পাহাৰত এই ঘটনা সংঘটিত হোৱাৰ বাবে জুই নুমুওৱাত যথেষ্ট অসুবিধাৰ সৃষ্টি হৈছিল। পাহাৰৰ পৰা বহু দূৰত থাকি বাহনসমূহে জুই নুমুৱাবলগীয়া হৈছিল। এই ক্ষেত্ৰত গাঁওবাসীৰ সহযোগিতাৰ শলাগ লয় বিভাগীয় বিষয়াই। আনহাতে, পূৰ্বেও একে স্থানতে কেইবাবাৰো অগ্নিকাণ্ড সংঘটিত হৈছে বুলি জনাইছে স্থানীয় ৰাইজে।
