নেশ্যনেল ডেস্ক, 8 এপ্ৰিল : কেন্দ্ৰীয় স্বাস্থ্য় মন্ত্ৰণালয়ে বুধবাৰে মন্তব্য কৰে যে, দেশৰ কোভিড-19 পৰিস্থিতি উচ্চ পৰ্যায়ত নিৰীক্ষণ কৰি থকা হৈছে ৷ শেহতীয়া তথ্য অনুসৰি, বুধবাৰ পৰ্যন্ত ভাৰতত কোভিড-19 ত আক্ৰান্তৰ সংখ্য়া 5,500 ৰো অধিক হৈছেগৈ ৷
চৰকাৰী তথ্য অনুসৰি, প্ৰধানমন্ত্ৰীৰ কাৰ্য়ালয়ে কোভিড-19 প্ৰতিৰোধৰ সমগ্ৰ পদক্ষেপক ধাৰাবাহিকভাৱে নিৰীক্ষণ কৰি আছে ৷
কেন্দ্ৰীয় স্বাস্থ্য মন্ত্ৰণালয়ৰ যুটীয়া সচিব লাভ আগৰৱালে কয়, "মঙলবাৰ পৰ্যন্ত 32 জন লোকৰ মৃত্যু হোৱাৰ ফলত মৃতকৰ সংখ্যা দেশত 149 জনলৈ বৃদ্ধি পাইছে, আনহাতে, আৰোগ্য হৈ উঠিছে 492 জন লোক ৷"
সকলোকে সামাজিক দূৰত্ব আৰু লকডাউন মানি চলিবলৈ আহ্বান জনাই আগৰৱালে কয়, "সাধাৰণ অৱহেলাৰ ফলতো সমগ্ৰ প্ৰচেষ্টাত চেঁচাপানী পৰিব পাৰে ৷"
গৃহ মন্ত্ৰণালয়ৰ যুটীয়া সচিব পুনিয়া ছালিলা শ্ৰীবাস্তৱে কয়, "যিসমূহ স্থানত অধিক আক্ৰান্তৰ ঘটনা পোহৰলৈ আহিছে সেই স্থানসমূহ বাচি উলিওৱা হৈছে ৷ ৰাজ্য চৰকাৰেও বিভিন্ন স্থানসমূহ চিনাক্ত কৰি বেৰিকেডৰ ব্যৱস্থা কৰিছে আৰু লকডাউন মানি চলিবলৈ সকলোকে বাধ্য কৰিছে ৷"
