নেশ্যনেল ডেস্ক,২৩ এপ্ৰিল: ভাৰতৰ উদ্যোগপতি মুকেশ আম্বানিৰ ঘৰৰ সন্মুখত উদ্ধাৰ হোৱা বিস্ফোৰক ভৰ্তি বাহনৰ ঘটনাই প্ৰতিদিনে নতুন ৰূপ লোৱা দেখা গৈছে । ঘটনা সন্দৰ্ভত এন আই এ য়ে তদন্ত অব্যাহত ৰাখিছে । এই ঘটনাৰ লগতে ব্যৱসায়ী মনসুখ হিৰেণৰ হত্যাকাণ্ডৰ লগত জড়িত থকাৰ অভিযোগত কেইবাগৰাকীক ইতিমধ্যে গ্ৰেপ্তাৰো কৰা হৈছে । এইবাৰ আন এগৰাকী আৰক্ষী এই ঘটনাত জড়িত থকাৰ অভিযোগত গ্ৰেপ্তাৰ । শুকুৰবাৰে ৰাষ্ট্ৰীয় অনুসন্ধানকাৰী সংস্থা (এন আই এ) ই মুম্বাই আৰক্ষীৰ পৰিদৰ্শক সুনীল মানেক গ্ৰেপ্তাৰ কৰে ।
বৃহস্পতিবাৰে সুনীলক উক্ত ঘটনা সন্দৰ্ভত জেৰা চলাইছিল এন আই এ য়ে । এগৰাকী শীৰ্ষ বিষয়াই জনোৱা মতে ঘটনাত জড়িত থকাৰ কথা পোহৰলৈ অহাৰ লগে লগে সুনীলক গ্ৰেপ্তাৰ কৰে অনুসন্ধানকাৰী সংস্থাটোৱে । জানিব পৰা মতে, মানেক বিয়লিৰ ভাগলৈ আদালতত হাজিৰ কৰোৱা হ'ব । কেন্দ্ৰীয় সংস্থাটোৱে ইয়াৰ পূৰ্বে মুম্বাইৰ দুজন আৰক্ষী বিষয়া ক্ৰমে শচীন ৱেজ আৰু ৰিয়াজ কাজীকে ধৰি চাৰিজন লোকক এই গোচৰত গ্ৰেপ্তাৰ কৰিছে ।
লগতে পঢ়ক:সকলো বেংক কৰ্মী আৰু বীমা কৰ্তাসকলক টীকাকৰণ কৰিবলৈ অনুৰোধ কেন্দ্ৰৰ
