দাৰ ঘাপত মৃত্যু মহিলাৰ, অভিযুক্ত স্বামীক গ্ৰেপ্তাৰ - Goalpara murder case

গোৱালপাৰা,১৫ এপ্ৰিল : ৰঙালী বিহুক লৈ ৰাজ্যত ব্যাপক উছাহ দেখিবলৈ পোৱা গৈছে । ৰঙালীৰ আনন্দত মতলীয়া সকলো । তাৰ মাজতে গোৱালপাৰা জিলাৰ দুধনৈত ভয়ংকৰ ঘটনা । আমজোঙাত দেওবাৰে নিশা সংগঠিত হয় এক লোমহৰ্ষক হত্যাকাণ্ড । জানিব পৰা মতে যোৱানিশা সুনীল খাখলাৰী নামৰ লোকজনে সুৰাপান কৰি ঘৰত হুলস্থূলীয়া পৰিৱেশৰ সৃষ্টি কৰিছিল । স্বামীৰ এনে কাৰ্যত অতিষ্ঠ হৈ পত্নী আৰতি খাখলাৰীয়ে তেওঁক চিঞৰ-বাখৰ বন্ধ কৰিবলৈ কৈছিল ।

কিন্তু সুৰাপায়ী স্বামীক বাধা দিয়াটোৱেই কাল হ'ল পত্নীৰ বাবে । প্ৰথমে দুয়োৰে মাজত কাজিয়া হয় আৰু তাৰ পিচতে এই কাজিয়াই অতি ভয়ংকৰ ৰূপ লয় । সুৰাপায়ী সুনীল খাখলাৰীয়ে ওচৰতে থকা দা এখনেৰে পত্নীক ঘপিয়ায় । এই ঘটনাত পত্নী আৰতি খাখলাৰীৰ থিতাতে মৃত্যু হয় । লগে লগে স্থানীয় লোকসকল আতংকিত হৈ পৰে আৰু তেওঁলোকে আৰক্ষীক খবৰ দিয়ে ।

দুধনৈ থানাৰ আৰক্ষী উপস্থিত হৈ অভিযুক্ত হত্যাকাৰী সুনীল খাখলাৰীক গ্ৰেপ্তাৰ কৰি থানালৈ লৈ যায় । আনহাতে পত্নীৰ মৃতদেহটোও উদ্ধাৰ কৰি মৰণোত্তৰ পৰীক্ষাৰ বাবে গোৱালপাৰা অসামৰিক চিকিৎসালয়লৈ প্ৰেৰণ কৰা হয় ।

লগতে পঢ়ক :অভিযুক্তৰ স্বীকাৰোক্তিৰ ভিত্তিত পুতি থোৱা মহিলাৰ মৃতদেহ উদ্ধাৰ - Golaghat Murder Case