তলাবন্ধ গেটৰ ওপৰেদি বগাই গৃহস্থ নথকা অৱস্থাতে স্মাৰ্ট মিটাৰ সংযোগ বিদ্যুৎ বিভাগৰ - APDCL SMART METERS

কলিয়াবৰ, ৩ আগষ্ট: বিদ্যুৎ যোগানত স্মাৰ্ট নহ'লেও অসম শক্তি বিতৰণ কোম্পানী স্মাৰ্ট মিটাৰ সংযোগত কিমান স্মাৰ্ট, তাৰ এক নোহোৱা-নোপোজা ঘটনা সংঘটিত হৈছে কলিয়াবৰত । কলিয়াবৰৰ কুঁৱৰীটোলস্থিত অসম শক্তি বিতৰণ কোম্পানীৰ উপ-সংমণ্ডলৰ প্ৰৱন্ধকৰ কাৰ্যালয়ৰ নাতিদূৰৰ গোমোঠা গাঁৱত সংঘটিত হৈছে এই আশ্চৰ্যকৰ কাণ্ড । বিদ্যুৎ বিভাগৰ লোকে গৃহস্থ নথকা অৱস্থাতে পুৰণা বৈদ্যুতিক মিটাৰ খুলি নতুনকৈ স্মাৰ্ট মিটাৰ লগাই থৈ যায় । 

কলিয়াবৰৰ গোমোঠা গাঁৱৰ মুকুতা বৰা নামৰ লোকজনৰ ঘৰত কোনো নথকাৰ সুযোগ লৈ তলা মাৰি থোৱা গেটৰ ওপৰেদি পাৰ হৈ গৈ বিদ্যুৎ বিভাগ আৰু ঠিকাদাৰী প্ৰতিষ্ঠানৰ লোকে কৰে এই কাণ্ড । স্থানীয় এ পি ডি চি এল উপ-সংমণ্ডল কাৰ্যালয়ত অভিযোগ দিয়ো একো সদুত্তৰ পোৱা নাই ভুক্তভোগী লোকজনে ।

অভিযোগ মতে, কেৱল মুকুতা বৰাৰ ঘৰতেই নহয়, কলিয়াবৰৰ কেইবাও ঘৰত শক্তি বিভাগে সংঘটিত কৰিছে এনে কাণ্ড । বৈদ্যুতিক স্মাৰ্ট মিটাৰৰ বিৰুদ্ধে ৰাজ্যত প্ৰতিবাদ চলি থকাৰ লগতে বহু বিদ্যুৎ গ্ৰাহকে নিজৰ ঘৰত বৈদ্যুতিক স্মাৰ্ট মিটাৰ লগাবলৈ নিদিয়াৰ বাবে চোৰৰ দৰে পুৰণি মিটাৰ সলাই নতুনকৈ স্মাৰ্ট মিটাৰ বিদ্যুৎ বিভাগে লগাই ফুৰাৰ অভিযোগ উঠিছে । 

লগতে পঢ়ক: বিলাসীপাৰাত বিদ্যুৎ বিভাগৰ বিৰুদ্ধে ৰাইজৰ উত্তাল প্ৰতিবাদ - Power Supply Disrupt