ৰহস্যজনকভাৱে পুখুৰীত পৰি মৃত্যু বিশেষভাৱে সক্ষম কিশোৰৰ, তদন্তৰ দাবী পৰিয়ালৰ - Death By Drowning

মৰিগাঁও, 17 আগষ্ট : মৰিগাঁৱত চৈধ্য বছৰীয়া কিশোৰৰ ৰহস্যজনক মৃত্যু ৷ পুখুৰীত পৰি মৃত্যু হয় বিশেষভাৱে সক্ষম কিশোৰৰ ৷ শুকুৰবাৰে সন্ধিয়া মৰিগাঁৱত সংঘটিত হয় এই ঘটনা ৷ পৰিয়ালৰ লোকে জনোৱা অনুসৰি সন্ধিয়া কিশোৰগৰাকীয়ে চাইকেল ভাল কৰিবলৈ মাতৃৰ পৰা এশ টকা লৈ ঘৰৰ পৰা ওলাই আহিছিল ৷ তেনে সময়তে পুখুৰীত কিবা পৰি যোৱাৰ শব্দ শুনি ওচৰৰ লোকে ততাতৈয়াকৈ এছ ডি আৰ এফক খবৰ দিয়ে ৷ এছ ডি আৰ এফে অভিযান চলাই চাইকেলসহ কিশোৰগৰাকীক পুখুৰীৰ পৰা উদ্ধাৰ কৰি মৰিগাঁও অসামৰিক চিকিৎসালয়লৈ নিয়ে যদিও চিকিৎসকে মৃত বুলি ঘোষণা কৰে ৷

পৰিয়ালৰ লোকে জানিবলৈ দিয়া অনুসৰি বিশেষভাৱে সক্ষম কিশোৰগৰাকীৰ সৈতে আন এজন লগৰীয়া আছিল বুলি সন্দেহ প্ৰকাশ কৰিছে ৷ শিশুটিৰ মৃত্যু সন্দৰ্ভত পৰিয়ালৰ লোকে মৰিগাঁও আৰক্ষীক সঠিকভাবে তদন্ত কৰিবলৈ আহ্বান জনাইছে ৷

লগতে পঢ়ক : বজ্ৰপাতত মৃত্যু একেটা পৰিয়ালৰ দুই ভাতৃৰ - Lightning strike in Nalbari