যোৰহাট-তিতাবৰ পৌৰসভাৰ পদেন সদস্য হিচাপে শপতগ্ৰহণ সাংসদ গৌৰৱ গগৈৰ - MP Gaurav Gogoi

যোৰহাট, ২৭ জুলাই : লোকসভাৰ বিৰোধী দলৰ উপ-দলপতি তথা যোৰহাট লোকসভা সমষ্টিৰ সাংসদ গৌৰৱ গগৈয়ে শনিবাৰে বিয়লি তিতাবৰ পৌৰসভাৰ কাৰ্যালয়ত পৌৰসভাৰ পদেন সদস্য হিচাপে শপত গ্ৰহণ কৰে । ইয়াৰ সমান্তৰালভাৱে সাংসদগৰাকীয়ে শতবৰ্ষ গৰকা যোৰহাট পৌৰসভাৰো পদেন সদস্য হিচাপে শপতগ্ৰহণ কৰে ।  

পদেন সদস্য হিচাপে শপতগ্ৰহণ কৰি সাংসদ গৌৰৱ গগৈয়ে কয়,"পৌৰসভাৰ জৰিয়তে বিভিন্ন উন্নয়নমূলক কাম-কাজ কৰিব পৰা যায় ।" ইপিনে, তিতাবৰ পৌৰসভাত সৃষ্টি হোৱা অচলাৱস্থা সন্দৰ্ভত সাংসদগৰাকীয়ে কয়,"তিতাবৰ পৌৰসভাৰ অচলাৱস্থা পৰ্যায়ক্ৰমে সমাধান কৰা হ'ব । "

শপতগ্ৰহণ কাৰ্যসূচীৰ আঁতধৰে কাৰ্যালয়ৰ মুখ্য সহায়ক মিঠাৰাম দাসে । তিতাবৰৰ অতিৰিক্ত আয়ুক্ত বিপাঞ্চী দত্তই সাংসদ গৌৰৱ গগৈক তিতাবৰ পৌৰসভাৰ পদেন সদস্য হিচাপে শপত বাক্য পাঠ কৰোৱায় । আনহাতে, যোৰহাট পৌৰসভাৰ পদেন সদস্য হিচাপে শপতগ্ৰহণ কৰোৱাই যোৰহাট জিলা অতিৰিক্ত আয়ুক্ত পংকজ বৰাই ।  

পৌৰসভাৰ লগতে দলীয় নেতা-কৰ্মীয়ে সাংসদগৰাকীক আদৰণি জনায় । এই অনুষ্ঠানটোত বিধায়ক তথা বিৰোধী দলৰ দলপতি দেৱব্ৰত শইকীয়া, বিধায়ক ভাস্কৰ বৰুৱাৰ লগতে পৌৰ সভাৰ ৱাৰ্ড কমিছনাৰ উপস্থিত থাকে ।

লগতে পঢ়ক:অসমৰ দ্বিতীয়খন পৌৰ নিগম হিচাপে কাৰ্যকৰী ডিব্ৰুগড় পৌৰ নিগম - 2nd Municipal Corporation of Assam