মহানগৰীৰ কটাহবাৰীত ভয়ংকৰ অগ্নিকাণ্ড

গুৱাহাটী, ১৯ মাৰ্চ: গুৱাহাটী মহানগৰীৰ কটাহবাৰীত আজি সংঘটিত হয় এক ভয়ংকৰ অগ্নিকাণ্ডৰ ঘটনা । কটাহবাৰীৰ দুই নং মছজিদৰ সংঘটিত হয় এই অগ্নিকাণ্ড । তুলা কাৰখানাৰ পৰা অগ্নিকাণ্ডৰ সূত্ৰপাত হোৱা বুলি উল্লেখ কৰে স্থানীয় ৰাইজে । তুলা কাৰখানাটোৰ লগতে আছিল এখন ফাৰ্ণিচাৰ বিপণি । কলিম আনছাৰী নামৰ এজন লোকে এই কাৰখানাটো চলাই আছে । এই অগ্নিকাণ্ডৰ ফলত পূৰ্বাঞ্চল হাৰ্ডৱেৰ আৰু আলী এন্টাৰপ্ৰাইজ নামৰ দুখন বিপণি জুইত জাহ যায় ।

এই ভয়াবহ অগ্নিকাণ্ডত তিনিটাকৈ চিলিণ্ডাৰৰ বিস্ফোৰণ হয় । ইয়াৰ পিচতেই ৰাইজে এই ঘটনাৰ বিষয়ে অগ্নি নিৰ্বাপক বাহিনীৰ সৈতে যোগাযোগ কৰিবলৈ চেষ্টা চলায় যদিও বহু সময়লৈকে যোগাযোগ কৰিব পৰা নাছিল বুলি অভিযোগ উত্থাপিত হৈছে । পিচত ৭খনকৈ অগ্নি নিৰ্বাপক বাহিনীৰ বাহনে জুই নিৰ্বাপিত কৰিবলৈ সক্ষম হয় । অগ্নিকাণ্ডত প্ৰায় ১৬ লাখ টকাৰ সম্পত্তি জুইত জাহ যায় । অগ্নিকাণ্ডটোৰ প্ৰকৃত কাৰণ এতিয়াও জানিব পৰা হোৱা নাই যদিও শ্বৰ্ট চাৰ্কিটৰ ফলতে সংঘটিত হোৱা বুলি সন্দেহ কৰা হৈছে ।

লগতে পঢ়ক:মৰিগাঁৱৰ শিলপুখুৰীত নামঘৰত নিশা দুৰ্বৃত্তই কৰিলে অগ্নিসংযোগ