বৰপেটাত বিজেপি মিত্ৰজোঁটৰ প্ৰাৰ্থী ফণীভূষণ চৌধুৰীৰ ব্যাপক নিৰ্বাচনী প্ৰচাৰ - Lok Sabha election 2024

বৰপেটা, ২ এপ্ৰিল: বৰপেটা লোকসভা সমষ্টিৰ অগপ-বিজেপি মিত্ৰজোঁটৰ প্ৰাৰ্থী ফণীভূষণ চৌধুৰীয়ে মঙলবাৰে বৰপেটা আৰু পাকা বেতবাৰী সমষ্টিৰ কেবাটাও স্থানত প্ৰচাৰ চলায় । পাকা বেতবাৰী সমষ্টিৰ খৰিচালাত প্ৰচাৰ চলোৱাৰ পাছত বৰপেটা বিধানসভা সমষ্টিৰ পাটবাউসীত উপস্থিত হয় নেতাগৰাকীয়ে । পাটবাউসীত অনুষ্ঠিত দুখন শীতলা পূজাস্থলীত উপস্থিত হৈ চৌধুৰীয়ে সেৱা জনোৱাৰ লগতে ৰাইজৰ সৈতে বাৰ্তালাপ কৰে । 

সাংবাদিকৰ আগত চৌধুৰীয়ে দাবী কৰে যে বৰপেটা লোকসভা সমষ্টিত তেওঁলোকৰ মিত্ৰজোঁটেই জয়লাভ কৰিব । তদুপৰি তেওঁ তিনি লাখৰো অধিক ভোটত জয়লাভ কৰিব বুলিও কয় । এই নিৰ্বাচনত বৰপেটা লোকসভা সমষ্টিত তেওঁ ধৰ্মীয় সংখ্যালঘু ভোটাৰৰো সমৰ্থন লাভ কৰিবলৈ সক্ষম হ'ব বুলি চৌধুৰীয়ে আশা প্ৰকাশ কৰে ।  

মুখ্যমন্ত্ৰী হিমন্ত বিশ্ব শৰ্মা নেতৃত্বাধীন চৰকাৰখনৰ দ্বাৰা ধৰ্মীয় সংখ্যালঘু লোকসকল যথেষ্ট উপকৃত হৈছে বুলি তেওঁ লগতে উল্লেখ কৰে । আনহাতে বৰপেটা জিলা বিজেপিৰ সভাপতি অনিল কুমাৰ দাসে কংগ্ৰেছ এটা গণতন্ত্ৰত নথকা দল বুলি কটাক্ষ কৰে ।

লগতে পঢ়ক: বলিৰ পঠা সজোৱা হৈছে ন বিজেপি সুৰেশ বৰাক: ভূপেন বৰা - LOK SABHA ELECTION 2024