১০৮ সেৱাৰ হেমাহিৰ বাবেই মহিলাৰ মৃত্যুৰ অভিযোগ

মাজুলী: ইটোৰ পিছত সিটোকৈ ঘটনা সংঘটিত হোৱাৰ পিছতো যেন শিক্ষা লোৱা নাই মাজুলীৰ স্বাস্থ্য বিভাগে । পুনৰ স্বাস্থ্য বিভাগ তথা স্বাস্থ্যকৰ্মীৰ গাফিলতিৰ বাবেই এগৰাকী মহিলাই প্ৰাণ হেৰুওৱাৰ গুৰুতৰ অভিযোগ উঠিছে । যাক লৈ মাজুলী জিলা চিকিৎসালয়ত সৃষ্টি হয় এক উত্তপ্ত পৰিস্থিতিৰ । ঘটনা অনুসৰি নিশা গড়মূৰৰ নিৱাসী দীপা বৰা নামৰ মহিলাগৰাকীক ভৰ্তি কৰোৱা হৈছিল গড়মূৰ জিলা চিকিৎসালয়ত । পেটৰ বিষত চটফটাই থকা দীপা বৰাক তাৎক্ষণিকভাৱে উন্নত চিকিৎসাৰ বাবে যোৰহাট বা ডিব্ৰুগড়লৈ নিয়াৰ পৰামৰ্শ দিছিল চিকিৎসকে । ওৰেটো নিশা ১০৮লৈ ফোন কৰি কোনো সঁহাৰি নাপালে পৰিয়ালৰ লোকে ।  

কোনোবাই যদি ১০৮ নাই বুলি কয় কোনোবাই আকৌ ফোনেই ৰিচিভ নকৰে । পুৱা চিকিৎসালয়খনৰ পিছফালে ২ খনকৈ ১০৮ সেৱাৰ গাড়ী দেখি পৰিয়ালৰ লোকে চিকিৎসালয়ৰ গাতে লাগি থকা ১০৮ কৰ্মীৰ কক্ষৰ পৰা কৰ্মীক টোপনিৰ পৰা জগাই উঠাব লগা হয় । কিন্তু তেতিয়ালৈকে বহুত দেৰি হৈছিল । ইতিমধ্যে শেষ নিশ্বাস ত্যাগ কৰিছিল মহিলাগৰাকীয়ে । ১০৮ সেৱাৰ চৰম গাফিলতিৰ বাবে জিলা চিকিৎসালয়খনতে ৪০ বছৰীয়া মহিলাগৰাকীৰ মৃত্যু হোৱাৰ অভিযোগ উত্থাপন কৰে পৰিয়ালৰ লোকে । পীতাম্বৰদেৱ জিলা চিকিৎসালয়ৰ অধীক্ষকেও স্বীকাৰ কৰিলে ১০৮ জৰুৰী সেৱাৰ গাফিলতিৰ কথা ।  

লগতে পঢ়ক: শ্ৰেণীকোঠাতে অসুস্থ হৈ পৰিল ছাত্ৰী: চিকিৎসকৰ বিৰুদ্ধে চিকিৎসাত গাফিলতিৰ অভিযোগ - lack of ambulance in govt hospital