চেপনত অজাপৰ যোগদান কাৰ্যসূচীত বিজেপি সমৰ্থকৰ আক্ৰমণ

মৰাণ, ১৭ মাৰ্চ: মৰাণৰ চেপনত আজি শতাধিক লোকে যোগদান কৰিলে অসম জাতীয় পৰিষদত । মৰাণৰ সমীপৰ চেপন পূজা ফিল্ডত আজি অনুষ্ঠিত এক যোগদান সভাত লোকসকলে অসম জাতীয় পৰিষদ দলত যোগদান কৰে ।  আজি যোগদান কৰা লোকসকলৰ অধিক সংখ্যকেই চাহ জনগোষ্ঠীয় । দলটোৰ সভাপতি লুৰিণজ্যোতি গগৈৰ উপস্থিতিত লোকসকলে অসম জাতীয় পৰিষদত যোগদান কৰে ।  

এই যোগদান কাৰ্যসূচীৰ পাছতে সৃষ্টি হয় এক উত্তপ্ত পৰিস্থিতিৰ । অসম জাতীয় পৰিষদৰ যোগদান কাৰ্যসূচীত বিজেপিৰ সমৰ্থকে আক্ৰমণ কৰাৰ অভিযোগ উত্থাপিত হৈছে । আজি অনুষ্ঠিত হোৱা এই যোগদান সভাত বিজেপিৰ সমৰ্থকে শাৰীৰিকভাৱে আক্ৰমণ কৰে অসম জাতীয় পৰিষদৰ সদস্য়ক । চেপন গাঁও পঞ্চায়তৰ প্ৰাক্তন সভাপতি গৰাকীৰ নেতৃত্বত এই অপ্ৰীতিকৰ পৰিস্থিতি সৃষ্টি হয় বুলি অভিযোগ উঠিছে  । যোগদান কাৰ্যসূচীত অংশগ্ৰহণ কৰি অসম জাতীয় পৰিষদৰ সভাপতি লুৰীণজ্যোতি গগৈয়ে সভা স্থলীৰ পৰা আঁতৰি যোৱা পাছতেই বিজেপিৰ এটা দলে ভয় ভাবুকি দিয়ে সভাত উপস্থিত ৰাইজক । লোকসভা নিৰ্বাচনৰ প্ৰাকক্ষণত সংঘটিত এই ঘটনাক লৈ ব্যাপক প্ৰতিক্ৰিয়া সৃষ্টি হৈছে । 

লগতে পঢ়ক:ছ্যুকাফাৰ প্ৰতিমূৰ্তিত সেৱা জনাই প্ৰচাৰ আৰম্ভ কৰিলে লুৰীণজ্যোতি গগৈয়ে