বৰপেটা, ১৫ ছেপ্টেম্বৰ : ‘‘মা মই যাওঁ...’’৷ সেই যে ‘মা’ৰ আশীৰ্বাদ লৈ পুৱাই সপোন এটাক বিচাৰি ককায়েক-ভনীয়েক ওলাই গ’ল, ঘূৰি আহি আৰু জীৱিত অৱস্থাত নাপালে ৷ সন্তান দুটিয়ে পৰীক্ষা দি থকা সময়তে নিয়তিৰ পৰীক্ষাত অনুত্তীৰ্ণ হ’ল বৰপেটাৰ মাতৃগৰাকী ৷ ‘‘সোণজনী-সোণটো পৰীক্ষা কেনেকুৱা হ’ল?’’ বুলি সুধিবলৈ নাপাওতেই এৰিবলগীয়া হ’ল এই ধৰা ৷
চাকৰি এটা কৰি জীৱনটোক থানথিত লগোৱাৰ সপোন দেখিছিল বৰপেটাৰ বিশ্বজিৎআৰু বৰ্ণালীয়ে ৷ সেয়ে দেওবাৰে ৰাজ্যৰ 11 লক্ষাধিক পৰীক্ষাৰ মাজৰ দুগৰাকী হৈ পাঠশালাত নিযুক্তি পৰীক্ষা দিবলৈ গৈছিল দুয়ো ৷ যোৱাৰ আগত দীৰ্ঘদিনে অসুস্থ হৈ থকা মাতৃক কৈ থৈ গ’ল- ‘‘মা আমি যাওঁ’’, দুয়োকে আশীৰ্বাদ দি থোকাথুকি মাতেৰে ‘মা’য়েও ক’লে- যোৱা ৷ সেই অনুসৰিয়ে পৰীক্ষাত বহিলগৈ বিশ্বজিৎ দাস আৰু বৰ্ণালী দাস ৷
পিচে তাৰ পিচতে ৰোগটোৱে বৰ বেছিকৈ হেঁচা মাৰি ধৰিলে বৃক্ক ৰোগত আক্ৰান্ত বিৰজা দাসক ৷ লগে লগে স্বামীয়ে বিৰজা দাসক লৈ গ’ল চিকিৎসালয়লৈ ৷ কিন্তু তেতিয়ালৈকে জীয়াই নাথাকিল বিৰজা দাস ৷ চিকিৎসকে আনুষ্ঠানিকভাৱে দিলে অসহনীয় খবৰটো ৷ তথাপি পিতৃয়ে খবৰটো নিদিলে পৰীক্ষাত বহি থকা ভাতৃ-ভগ্নীহালক ৷ কাৰণ এটাই- ‘‘মানুহগৰাকীকতো হেৰুৱালোৱেই, এই খবৰৰ বাবেই সিহঁত দুটাই যাতে চাকৰিটো নেহেৰুৱায় !’’
পৰীক্ষা শেষ কৰি অসুস্থ হৈ থকা মাকলৈ কাষলৈ ঢপলিয়াই আহিল বিশ্বজিৎআৰু বৰ্ণালী ৷ আহি দেখিলে মাতৃক ঢাকি থোৱা আছে এখন বগা কাপোৰেৰে, চোতালত ৷ পৰীক্ষা কেনেকুৱা হ’ল শুনিবলৈ ‘মা’ যে আৰু নাই, সেই কথা জানিবলৈ দুয়োৰে বাকী নাথাকিল ৷ কেউফালে কেৱল উচুপনি, কান্দোনৰ ৰোল ৷ বৰপেটাৰ ১ নং গলিয়াহাটীৰ এই ঘটনাই এতিয়া কন্দুৱাইছে খবৰটো পোৱা সকলোকে ৷
