যোৰহাট, ২২ আগষ্ট : ‘‘তিনিমাহ জে’ল খাটি ওলাই অহাটোৱেই লক্ষ্য নহয়, ওলাই আহি আকৌ সমাজখন কলুষিত কৰিব ৷ সমাজৰ আৱৰ্জনা আঁতৰাই পঠিয়াবলৈ সৃষ্টি আৰু ধ্বংসৰ প্ৰতীক নাৰী জাগ্ৰত হ’ব লাগিব ৷’’ বৃহস্পতিবাৰে যোৰহাটৰ দুটাকৈ যৌন উৎপীড়নৰ ঘটনাৰ বিৰুদ্ধে প্ৰতিবাদ সাব্যস্ত কৰিবলৈ আহি এইদৰে ক’লে এগৰাকী প্ৰতিবাদকাৰীয়ে ৷
উল্লেখ্য যে ১২ আগষ্ট আৰু ১৯ আগষ্টত যোৰহাটত সংঘটিত হৈছিল দুটাকৈ যৌন উৎপীড়নৰ ঘটনা ৷ দুয়োটাৰ ঘটনাৰে অভিযুক্ত অনা-অসমীয়া ৷ ১২ আগষ্টত দিল্লীৰ আকবৰ আলীৰ বিৰুদ্ধে এগৰাকী কিশোৰী খেলুৱৈক ধৰ্ষণ কৰাৰ অভিযোগ উত্থাপিত হৈছিল ৷ এগৰাকী কিশোৰী খেলুৱৈক টাইকোৱাণ্ডোৰ প্ৰশিক্ষণ দিয়াৰ বাবে প্ৰলোভিত কৰি যৌন নিৰ্যাতন চলোৱাৰ অভিযোগ উত্থাপিত হৈছে আকবৰ আলীৰ বিৰুদ্ধে ৷ আনহাতে তিতাবৰ তিনিআলিত ১৯ আগষ্টত মহাবিদ্যালয়ৰ ছাত্ৰীক অভব্য আচৰণ, অশ্লীল ইংগিত দিয়াৰ অভিযোগ অনা-অসমীয়া অংকুৰ শ্বাহৰ বিৰুদ্ধে উত্থাপিত হৈছে ৷
দ্ৰুত হাৰত বৃদ্ধি পোৱা এনে নাৰী নিগ্ৰহ ঘটনাৰ বিৰুদ্ধে প্ৰতিবাদ সাব্যস্ত কৰি নাৰীৰ নিৰাপত্তা আৰু ন্যায় বিচাৰি বৃহস্পতিবাৰে ৰাজপথলৈ ওলাই আহিল তিতাবৰৰ নাৰীসমাজ ৷ অসমত থাকি খিলঞ্জীয়াক অনা-অসমীয়াই অত্যাচাৰ কৰাটো কেতিয়াও সহ্য কৰা নহ’ব বুলি প্ৰতিবাদী মহিলাসকলে সকীয়নি দিয়ে ৷ তদুপৰি অসমীয়া বা অনা-অসমীয়া যিয়েই নাৰীৰ লগত অপকৰ্মত লিপ্ত হৈছে, সেইসকল দোষীক দৃষ্টান্তমূলক শাস্তি তথা মৃত্যুদণ্ডৰ দাবী তোলে প্ৰতিবাদকাৰী মহিলাসকলে ৷
তিতাবৰৰ মহিলাশক্তি একগোট হৈ নাৰীক নিৰাপত্তা প্ৰদানৰ লগতে শাৰীৰিক-মানসিকভাৱে নাৰীৰ ওপৰত অত্যাচাৰ চলোৱাসকলক কঠোৰ শাস্তিৰ দাবীত তিতাবৰ ষ্টেচন তিনিআলিত প্ৰচণ্ড ৰ'দকো নেওচি প্ৰতিবাদ সাব্যস্ত কৰে ৷ উক্ত প্ৰতিবাদৰ জৰিয়তে তিতাবৰ মহকুমা প্ৰশাসনক স্মাৰকপত্ৰও প্ৰদান কৰে প্ৰতিবাদকাৰীসকলে ।
লগতে পঢ়ক : পশ্চিমবংগৰ ধৰ্ষণ-হত্যাৰ ঘটনাৰ ন্যায়ৰ দাবীত শিক্ষাৰ্থীৰ প্ৰতিবাদ
