ৰাজ্যত বিদ্যুতৰ সংকট : চাহিদা ২৫০০ মেগাৱাট আৰু উৎপাদন ৪২০ মেগাৱাট - Power crisis in Assam

Assam electricity crisis : গুৱাহাটীকে ধৰি সমগ্ৰ অসমতে সঘন বিদ্যুৎ কর্তনত অতিষ্ঠ সাধাৰণ জনতা । এ পি ডি চি এলে অধিক মূল্যত বিদ্যুৎ ক্ৰয় কৰিও পূৰণ কৰিব পৰা নাই চাহিদা । অনিয়মীয়া বিদ্যুৎ সেৱাৰ পাচতো মাচুল বৃদ্ধিত অলপো কৃপনালি নকৰে শক্তি বিভাগে । অতি কৌশলপূর্ণভাৱে বিদ্যুৎ গ্ৰাহকৰ ওপৰত মাধমাৰ শোধালে ৰাজ্যৰ শক্তি বিভাগে ।

গুৱাহাটী, ৪ জুলাই : অসমত পিক আৱাৰত ২৫০০ মেগাৱাট বিদ্যুতৰ প্ৰয়োজন হোৱাৰ বিপৰীতে উৎপাদন হয় মাত্ৰ ৪২০ মেগাৱাট । এই কথা আমি কোৱা নাই । এই কথা সদৰী কৰিছে খোদ মুখ্যমন্ত্ৰী হিমন্ত বিশ্ব শৰ্মাই । অলপতে জনতা ভৱনত সৌৰশক্তিৰ প্ৰকল্প এটা উদ্বোধন কৰি দিয়া ভাষণত মুখ্যমন্ত্ৰীয়ে এই তথ্য সদৰী কৰে ।

বিদ্যুতৰ এই বিশাল চাহিদা পূৰণ কৰাৰ ক্ষেত্ৰত চৰকাৰখনে সৌৰ শক্তিৰ ওপৰত গুৰুত্ব আৰোপ কৰি এনে প্ৰকল্প স্থাপনৰ বহুকেইখন আঁচনি গ্ৰহণ কৰিছে । মুখ্যমন্ত্ৰীয়ে সদৰী কৰা তথ্য অনুসৰি অসমত বিদ্যুতৰ ৬০ লাখ উপভোক্তা আছে । বৰ্তমান সময়ত বিদ্যুতৰ চাহিদা পূৰণ কৰিবলৈ বাহিৰা উৎসৰ পৰা বিদ্যুৎ ক্ৰয় কৰা হয় ।

মুখ্যমন্ত্ৰীয়ে দিয়া তথ্য অনুসৰি বৰ্তমান সময়ত পিক আৱাৰত প্ৰতি ইউনিট বিদ্যুৎ ১০ টকাত ক্ৰয় কৰা হয় আৰু উপভোক্তাক দিয়া হয় ৫.৮৫ টকাত । বাকীখিনি টকা বহন কৰে ৰাজ্য চৰকাৰে ।

'এ পি জি চি এল'-এ নিজস্বভাৱে উৎপাদন কৰে মাত্ৰ ৪২০ মেগাৱাট বিদ্যুৎ । লক্ষণীয় বিষয় যে বিভিন্ন উৎসৰ পৰা বিদ্যুৎ ক্ৰয় কৰি ৰাজ্যৰ বিদ্যুতৰ চাহিদা পূৰণ কৰি আহিছে এ পি ডি চি এলে ।

• চাহিদা পূৰণ কৰিব নোৱাৰি বিদ্যুৎ কৰ্তন :

সৰ্বাধিক ব্যৱহাৰৰ সময়ত ৰাজ্যত বিদ্যুতৰ চাহিদা ২২০০ মেগাৱাটৰ পৰা ২৫০০ মেগাৱাটলৈ বৃদ্ধি পায় । কিন্তু ইয়াৰ বিপৰীতে এ পি জি চি এলৰ নিজস্ব উৎপাদন হয় মাত্ৰ ৪২০ মেগাৱাট । অৱশ্যে সদায়ে উৎপাদন একে নাথাকে ।

প্ৰায়ে উৎপাদন ৩৫০ মেগাৱাটৰ তলতো হয় । যাৰ বাবে বিদ্যুতৰ বাবে আনৰ ওচৰত হাত পাতি অহা অসম শক্তি বিতৰণ কোম্পানী লিমিটেডে প্ৰয়োজনীয় বিদ্যুৎ যোগাৰ কৰিব নোৱৰাৰ পৰিণতিত ৰাজ্যজুৰি অভাৱনীয় হাৰত অব্যাহত আছে বিদ্যুৎ কর্তন ।

বিভিন্ন উৎসৰ পৰা চাহিদা অনুপাতে বিদ্যুৎ ক্ৰয় কৰাৰ পাচতো প্ৰায়ে বিদ্যুতৰ ঘাটি হয় । সেই ঘাটি পূৰণ কৰিবলৈ এ পি ডি চি এলে বিদ্যুৎ কৰ্তন কৰে । বৰষুণৰ সময়ত লোডশ্বেডিঙৰ ইমান প্ৰভাৱ নপৰে যদিও প্ৰচণ্ড গ্ৰীষ্ম প্ৰৱাহৰ সময়ত লোডশ্বেডিঙে সমস্যাত পেলায় সাধাৰণ জনতাক ।

লগতে পঢ়ক : সঘন লোডশ্বেডিঙত অতিষ্ঠ সাধাৰণ জনতা : ঠায়ে ঠায়ে বিদ্যুৎ আহে মাজে-সময়ে - Load Shedding in Assam

উল্লেখ্য যে, কেৱল গ্ৰামাঞ্চলেই নহয় গুৱাহাটীতো বিদ্যুতৰ সঘন লুকা-ভাকুৱে অতিষ্ঠ কৰি তুলিছে সাধাৰণ জনতাক । বিগত সময়ত গুৱাহাটী মহানগৰীৰ বিভিন্ন স্থানত বৃদ্ধি পাইছে বিদ্যুৎ কর্তন । কেৱল বিদ্যুৎ কর্তনেই নহয় গুৱাহাটীৰ ঠায়ে ঠায়ে বিদ্যুতৰ কম ভল্টেজৰ বাবেও সমস্যাৰ সন্মুখীন হৈছে উপভোক্তা ।

ইফালে বৰষুণ দিলেই বিদ্যুৎ সংযোগ কৰ্তন কৰাটো এটা নিয়মত পৰিণত হৈছে । এ পি ডি চি এলে চাহিদা অনুপাতে প্ৰায় সম্পূর্ণ বিদ্যুৎ যোগান ধৰা বুলি দাবী কৰি আহিলেও কিন্তু বাস্তৱত তেনে নহয় । কাৰণ তাৰ প্ৰমাণ সঘন লোডশ্বেডিং ।