যোৰহাট, 30 জুন : অৰুণাচল প্ৰদেশৰ লগতে উজনি অসমত হৈ থকা নেৰানেপেৰা বৰষুণৰ ফলত ব্ৰহ্মপুত্ৰৰ জলস্তৰ দ্ৰুত গতিত বৃদ্ধি পাইছে ৷ ব্ৰহ্মপুত্ৰকে ধৰি কেবাখনো নদীৰ জলস্তৰ বৃদ্ধি পোৱাৰ ফলত ইতিমধ্যে ৰাজ্যৰ সাতখন জিলা বানৰ কবলত পৰিছে ৷ বানাক্ৰান্ত অঞ্চলত এতিয়া ব্যাহত হৈছে যাতায়ত-যোগাযোগ তথা স্বাভাৱিক জীৱন যাত্ৰা ৷ ইয়াৰ মাজতে মাজুলীলৈ বন্ধ হৈ পৰিছে ফেৰী সেৱা ৷
ইফালে ব্ৰহ্মপুত্ৰৰ জলস্তৰ বৃদ্ধি পোৱাৰ ফলত নিমাতীত সৃষ্টি হৈছে এক অভাৱনীয় পৰিৱেশ ৷ নিমাতী ঘাটৰ যাত্ৰী উঠা-নমা কৰা সকলো ৰেম্প বাঢ়নী পানীত ডুব গৈছে ৷ নিমাতী ঘাটৰ সকলো স্থান পানীৰ তলত থকাৰ বাবে এতিয়া জাহাজ ৰাখিবলৈ ঠাই নাইকিয়া হৈছে ৷ ফলত আভ্যন্তৰীণ জল পৰিবহণ বিভাগৰ সকলো জাহাজ পানীত উটি-ভাঁহি থাকিবলগীয়া হৈছে ৷ জলস্তৰ বৃদ্ধি পোৱাৰ ফলত জাহাজ সমূহ আন স্থানলৈ নিবলৈ অপৰাগ হৈ পৰিছে জলপৰিবহণ বিভাগ ৷ ইতিমধ্যে জিলা প্ৰশাসনৰ লোক নিমাতী ঘাটত উপস্থিত হৈ সকলো দিশ নিৰীক্ষণ কৰাৰ লগতে আভ্যন্তৰীণ জল পৰিবহণ বিভাগৰ কৰ্মচাৰী সৈতে ঘনে ঘনে বৈঠকত মিলিত হৈছে ৷
