গুৱাহাটী : মুখ্যমন্ত্ৰী হিমন্ত বিশ্ব শৰ্মাই অসমক দেশৰ পাঁচখন শ্ৰেষ্ঠ উন্নত ৰাজ্যৰ ভিতৰত অন্তৰ্ভুক্তৰ লক্ষ্য নিৰ্ধাৰণ কৰাৰ কথা সততে ৰাজহুৱা সভাবোৰত আওৰাই থাকে । কিন্তু বাস্তৱ ক্ষেত্ৰত অসমে অন্য দিশতহে দেশৰ শ্ৰেষ্ঠ ৰাজ্যৰ তালিকাত স্থান লাভ কৰিছে ।
কেন্দ্ৰীয় চৰকাৰৰ শেহতীয়া সমীক্ষা মতে, অসমে নিৱনুৱা বৃদ্ধিৰ ক্ষেত্ৰত প্ৰথম পাঁচখন ৰাজ্যৰ ভিতৰত স্থান পাইছে । অসমত নগৰাঞ্চলত ব্যাপক হাৰত কাম বিচাৰি কাম নোপোৱা নিবনুৱাৰ সংখ্যা বৃদ্ধি পাইছে । অসমৰ মুখ্যমন্ত্ৰীয়ে অসমত তেওঁৰ কাৰ্যকালত এক লাখ নিযুক্তি দিয়া আৰু হিতাধিকাৰী সৃষ্টিৰ অভিলেখ ৰচা বুলি দাবী কৰাৰ বিপৰীতে তেওঁৰ কাৰ্যকালতে অসমে নিৱনুৱা বৃদ্ধিৰ ক্ষেত্ৰত ৰেকৰ্ড সৃষ্টি কৰিছে ।
নিবনুৱা সম্পর্কত কেন্দ্রীয় চৰকাৰৰ Ministry of statistical and program implementation-ৰ ১৮ নৱেম্বৰৰ এখন প্ৰতিবেদনে অসমৰ নিবনুৱা সন্দৰ্ভত এক উদ্বেগজনক ছবি দাঙি ধৰিছে । প্রতিবেদন অনুসৰি, অসমৰ নগৰাঞ্চলৰ ১৫ৰ পৰা ২৯ বছৰ বয়সৰ মহিলা নিবনুৱাৰ হাৰ দেশৰ ভিতৰতে চতুৰ্থ । আনহাতে, পুৰুষ নিবনুৱাৰ ক্ষেত্ৰতো দেশৰ ভিতৰতে অসম চতুৰ্থ ।
উল্লেখ্য যে কেন্দ্ৰীয় পৰিসংখ্যা মন্ত্রণালয়ে প্রতি তিনি মাহৰ মূৰে মূৰে 'পিৰিয়ডিক লেবাৰ ফ'ৰ্চ ছার্ভে'ৰ (পি এল এফ এছ) প্ৰতিবেদন প্ৰকাশ কৰে । নগৰাঞ্চলৰ নিবনুৱাৰ হাৰ প্ৰকাশ কৰি যোৱা জুলাই মাহৰ পৰা ছেপ্টেম্বৰ মাহলৈ পি এল এফ জৰীপ ১৮ নৱেম্বৰত প্রকাশ কৰিছে ।
লক্ষণীয়ভাৱে, ২০২৩ চনৰ পৰা অসমত ক্রমান্বয়ে নগৰীয়া নিবনুৱাৰ সংখ্যা বৃদ্ধিয়ে চৰকাৰৰ নিবনুৱা সমস্যা হ্রাস আৰু কৰ্মসংস্থাপন বৃদ্ধিৰ দাবীক অসাৰ বুলি প্ৰতিপন্ন কৰিছে । পৰিসংখ্যা মন্ত্ৰণালয়ৰ তথ্য মতে, অসমত ১৫ৰ পৰা ২৯ বছৰ বয়সৰ ২০২৩ চনৰ জুলাই-ছেপ্টেম্বৰত পুৰুষ নিবনুৱাৰ হাৰ (নগৰাঞ্চল) আছিল ১৫.৮ শতাংশ । ২০২৪ চনৰ জুলাই-ছেপ্টেম্বৰত সেই হাৰ ২০.৮ শতাংশলৈ বৃদ্ধি পায় ।
ইফালে অসমত ১৫ৰ পৰা ২৯ বছৰ বয়সৰ ২০২৩ চনৰ জুলাই-ছেপ্টেম্বৰৰ মহিলা নিবনুৱাৰ হাৰ (নগৰৰ) আছিল ৩২.৩ শতাংশ । ২০২৪ চনৰ জুলাই-ছেপ্টেম্বৰত সেই হাৰ ৩৯.৩ শতাংশলৈ বৃদ্ধি পায় । আনহাতে, অসমত ১৫ৰ পৰা ২৯ বছৰ বয়সৰ ২০২৩ চনৰ জুলাই-ছেপ্টেম্বৰৰ সামগ্ৰিক নিবনুৱাৰ হাৰ (নগৰৰ) আছিল ২১.১ শতাংশ । ২০২৪ চনৰ জুলাই-ছেপ্টেম্বৰত সেই হাৰ বাঢ়ি ২৫.৬ শতাংশ হয় ।
উল্লেখ্য, মহিলা নিবনুৱাৰ ক্ষেত্ৰত অসমৰ স্থান চতুৰ্থত । নিৱনুৱাৰ হাৰৰ ক্ষেত্ৰত ৫৩.৬ শতাংশৰে জম্মু-কাশ্মীৰ দেশৰ ভিতৰত প্ৰথম স্থানত । দ্বিতীয় স্থানত থকা হিমাচল প্ৰদেশৰ নিবনুৱাৰ হাৰ ৪৩ শতাংশ, তৃতীয় স্থানত থকা কেৰালাৰ ৪০ শতাংশ আৰু চতুৰ্থ স্থানত থকা অসমৰ ৩৯.৩ শতাংশ ।
আনহাতে, পুৰুষ নিবনুৱাৰ ক্ষেত্ৰতো অসমৰ স্থান চতুৰ্থ স্থানত । নিৱনুৱাৰ হাৰৰ ক্ষেত্ৰত ২৮.১ শতাংশৰে ওড়িশা দেশৰ ভিতৰত প্ৰথম স্থানত আছে । দ্বিতীয় স্থানত থকা অন্ধ্ৰপ্ৰদেশৰ ২২.৫ শতাংশ, তৃতীয় স্থানত থকা বিহাৰৰ ২১.৫ শতাংশ আৰু চতুৰ্থ স্থানত থকা অসমৰ নিবনুৱাৰ হাৰ ২০.৮ শতাংশ ।
ইপিনে সামগ্ৰিক নিবনুৱাৰ ক্ষেত্ৰত অসমৰ স্থান চতুৰ্থ স্থানত । সামগ্ৰিক নিৱনুৱাৰ হাৰৰ ক্ষেত্ৰত জম্মু-কাশ্মীৰ ৩২ শতাংশৰে দেশৰ ভিতৰত প্ৰথম স্থানত । দ্বিতীয় স্থানত থকা ওড়িশাৰ ৩০.৪ শতাংশ, তৃতীয় স্থানত থকা কেৰালাৰ ২৭.৬ শতাংশ আৰু চতুৰ্থ স্থানত থকা অসমৰ ২৫.৬ শতাংশ ।
মন কৰিবলগীয়া কথাটো হ'ল, ৰাজ্যৰ গ্রামাঞ্চলত কাম বিচাৰি নোপোৱা বাবেই যুৱচামে নগৰাঞ্চললৈ কাম বিচাৰি ঢাপলি মেলে । কোনো সুবিধা নথকা আদি কাৰণৰ বাবেই দলে দলে যুৱচামে নগৰাঞ্চললৈ ঢাপলি মেলিছে । কিন্তু চৰকাৰৰ দাবীৰ বিপৰীতে নগৰতো যে কামৰ অভাৱ, তাৰ সত্যতা মন্ত্ৰণালয়ৰ প্ৰতিবেদনৰ তথ্যই উদঙাই দিছে ।
