লখিমপুৰ, 14 আগষ্ট : বিদেশী বিতাড়ণ আন্দোলনত ৮৬০ গৰাকী শ্বহীদ হ’ল । নিৰ্যাতিত হ’ল বহুজন । অসম চুক্তিৰ জৰিয়তে সেই বিশ্বখ্যাত আন্দোলন শাম কাটিছিল । সেই চুক্তিৰ আজি ৩৯ বছৰ পূৰ্ণ হোৱা উপলক্ষে সদৌ অসম ছাত্ৰ সন্থাৰ আহ্বানমৰ্মে ৰাজ্যজুৰি প্ৰতিখন জিলা সমিতিয়ে ৮৬০ গছি বন্তি প্ৰজ্বলন কৰি শ্বহীদসকলক সোঁৱৰণ কৰি শ্ৰদ্ধা জনায় ।
ৰাজ্যৰ আন জিলাৰ দৰে লখিমপুৰতো জিলা ছাত্ৰ সন্থাই উত্তৰ লখিমপুৰ আঞ্চলিক ছাত্ৰ সন্থাৰ সহযোগত শ্বহীদবেদীৰ প্ৰাংগণত ৮৬০ গছি বন্তি প্ৰজ্বলন কৰে । এই কাৰ্যসূচীত ছাত্ৰ সন্থাৰ বিষয়ববীয়া আৰু কৰ্মীসকলৰ উপৰি শ্বহীদৰ পৰিয়াল, নিৰ্যাতিৰ পৰিয়াল, শিক্ষক সমাজ, সাহিত্য সভাকে ধৰি বিভিন্ন সংগঠনৰ বিষয়ববীয়াই অংশগ্ৰহণ কৰে ।
জিলা ছাত্ৰ সন্থাৰ ভাৰপ্ৰাপ্ত সভাপতি ক্ষীৰোদ দুৱৰা, সম্পাদক পুনমজ্যোতি বুঢ়াগোহাঁই আদিৰ লগতে ছাত্ৰ সন্থাৰ ন-পুৰণি বহু ছাত্ৰনেতাই অংশগ্ৰহণ কৰে । জিলা সমিতিৰ সম্পাদক পুনমজ্যোতি বুঢ়াগোহাঁয়ে কয়, ‘‘অসম চুক্তিৰ ৩৯ বছৰ পূৰ্ণ হোৱাৰ সময়ত আমি সদৌ অসম ছাত্ৰ সন্থাৰ আহ্বানমৰ্মে শ্বহীদসকলৰ স্মৃতিত বন্তি প্ৰজ্বলন কৰিছো । অসম চুক্তি স্বাক্ষৰ হোৱাৰ পিছত বহু চৰকাৰ আহিল আৰু গ’ল । কিন্তু কোনো এখন চৰকাৰে অসম চুক্তি ৰূপায়ণ কৰাত সদিচ্ছা নেদেখুৱালে ।’’
তেওঁ কয়, ‘‘ আমি কৈ আহিছো অসম চুক্তি আখৰে আখৰে ৰূপায়ণ কৰিব লাগে । কিন্তু চৰকাৰসমূহে এইক্ষেত্ৰত সদিচ্ছা দেখুওৱা নাই । অসম চুক্তিৰ ৬ নং দফা ৰূপায়ণ হ’ব লাগে । তেতিয়া শ্বহীদৰ ত্যাগ অথলে নাযায় । অসম চুক্তি স্বাক্ষৰ হোৱাৰ ৪০ বছৰত ভৰি দিয়া দিনটোত আমি চৰকাৰক দাবী জনাইছো । অতি শীঘ্ৰে অসম চুক্তি ৰূপায়ণ কৰক । ৮৬০ গৰাকী শ্বহীদৰ ত্যাগক অথলে যাবলৈ নিদিব । কাৰণ তেওঁলোকৰ ত্যাগৰ বিনিময়ত অসম চুক্তি স্বাক্ষৰিত হৈছিল ।’’
চৰকাৰক ছাত্ৰনেতাজনে দাবী জনাই কয়, ‘‘ অসম আন্দোলনত যিসকল ধৰ্ষিতা, গুলীবিদ্ধ হৈছিল তেওঁলোকৰ সংস্থাপনৰ ব্যৱস্থা কৰক । যদিহে চৰকাৰে অসম চুক্তি ৰূপায়ণৰ ক্ষেত্ৰত আৰু পলম কৰে তেন্তে ছাত্ৰ সন্থাই আন্দোলন তীব্ৰতৰ কৰি তুলিব ।’’
লগতে পঢ়ক : 'কা'ৰ ফলাফল: অসমত থাকি 'ভাৰতীয়' হ'ল প্ৰথমজন বাংলাদেশী দুলন দাস
